Անդրանիկ Քոչարյանը պարզաբանեց, թե ինչու Հայաստանը դուրս չի գալիս նոյեմբերի 9-ի եռակողմ հայտարարությունից
2 րոպեի ընթերցում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ։ Առկախված խնդիրները լուծելու համար Հայաստանը չպետք է հետ վերցնի նոյեմբերի 9-ի եռակողմ հայտարարության ստորագրությունը։ «Արմենպրես»-ի հաղորդմամբ՝ խորհրդարանական ճեպազրույցի ժամանակ այս մասին ասաց Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ պարզաբանելով, թե ինչու Հայաստանը դուրս չի գալիս նոյեմբերի 9-ի եռակողմ հայտարարությունից։
«Նոյեմբերի 9-ի հայտարարությունն ունի երեք ստորագրություն. Ռուսաստանի Դաշնությունը, Ադրբեջանը և Հայաստանն ունեն պարտականություններ հրադադարի պահպանման ուղղությամբ։ Հիմա շատերն ասում են, թե ինչո՞ւ Հայաստանը դուրս չի գալիս հայտարարությունից և իր ստորագրությունը հետ չի կանչում։ Հայաստանը չպետք է հետ վերցնի իր ստորագրությունը, որպեսզի մնացած խնդիրները, որոնք առկախված են, ինչ-որ պահի հնարավոր լինի նաև դիվանագիտական ճանապարհով լուծել: Դրա մեջ կարող է դիտարկվել նաև մեր արցախահայության վերադարձի հնարավորությունը: Հայտարարության մյուս երկու կողմերն իրենց պարտականություններն, այնուամենայնիվ, չեն կատարել»,- ընդգծեց Քոչարյանը։
Անդրադառնալով այսպես ասած՝ «Զանգեզուրի միջանցք»-ի մասին շահարկումներին՝ Քոչարյանը նշեց, որ այդ բոլոր հարցերը լուծվում են խաղաղության պայմանագրի տրամաբանության շրջանակում, Հայաստանի անվտանգության համակարգի զարգացման տեսանկյունից։
«Դա այն է, ինչն այսօր արվում է առանց թմբկահարելու, առանց ավելորդ լարվածություն առաջացնելու»,- եզրափակեց Քոչարյանը։