2 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում այս տարի ավելացել է արհեստագործական և միջին մասնագիտական կրթական ծրագրերով ընդունվող ուսանողների թիվը:
«Արմենպրես»-ի հաղորդմամբ՝ այս մասին ասուլիսում հայտնեց Կրթության, գիտության, մշակույթի և սպորտի նախարար Ժաննա Անդրեասյանը:
Նախարարն ասաց, որ այս տարի քոլեջներում ընդունելության իմաստով բավականին լավ արդյունքներ են գրանցվել:
«Արհեստագործական կրթական ծրագրերով այս տարի ընդունելության արդյունքներով ունենք 3862 ուսանող, նախորդ տարի ունեցել ենք 3106»,-ասաց Անդրեասյանը:
Նախարարը հիշեցրեց, որ սրանք հենց այն ուղղություններն են, որ նախորդ տարի կառավարության որոշմամբ որպես գերակայություն են սահմանվել: ՄԿՈՒ հաստատություններում սահմանվել է կրթաթոշակի նոր չափ՝ ամսական 50 հազար դրամի չափով: Դա սահմանվել է արդյունաբերության, շինարարության և գյուղատնտեսության ոլորտի մասնագիտությունների գծով:
«Արդեն երկրորդ տարվա ընդունելությունը ցույց է տալիս, որ դիմորդներն արձագանքում են այս քաղաքականությանը: Մրցութային ընդունելություն ենք ունենում այն մասնագիտությունների գծով, որոնք պահանջված էին տնտեսությունում, որտեղ տարիներ շարունակ բավարար թվով դիմորդներ չէին լինում անգամ անվճար տեղերի համար»,-ասաց նախարարը:
Ավելացել են նաև միջին մասնագիտական կրթական ծրագրերով ուսանողների ընդունելության արդյունքները: Նախորդ տարի ընդունվել է 10 հազար 417 ուսանող, այս տարի՝ 11 հազար 100-ից ավելի:
Անդրեասյանը նշեց՝ միտումը շարունակվում է, ընդունելության շատ ավելի մեծ արդյունքներ են գրանցվում այն ուղղություններով, որտեղ կրթաթոշակի վերանայված քաղաքականություն է գործում: