ՀՀ ԿԳՄՍ նախարարությունը պարզաբանել է ուսուցիչների վերապատրաստման և ատեստավորման նոր կարգը
3 րոպեի ընթերցում
![ՀՀ ԿԳՄՍ նախարարությունը պարզաբանել է ուսուցիչների վերապատրաստման և ատեստավորման նոր կարգը](http://armenpress.am/resized/480/storage/images/articles/2024/09/04/cx7IZA3f4NbQswSRzF45KH8tfCK26HNUMX6o179I.webp)
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Ուսուցիչների հերթական վերապատրաստման և ատեստավորման գործընթացն առաջին անգամ իրականացվում է մասնագիտական կարիքի գնահատման արդյունքների հիման վրա՝ համաձայն նոր կարգի:
Ինչպես «Արմենպրես»-ին տեղեկացրին ՀՀ կրթության, գիտության, մշակույթի և սպորտի նախարարությունից, ԿԳՄՍ նախարարությունը դպրոցներից ստացել է գրություններ և հարցումներ առ այն, որ Կրթության կառավարման տեղեկատվական առցանց համակարգում հարցաթերթիկի լրացման ժամանակ պարտադիր ատեստավորման ենթակա որոշ ուսուցիչների կարիքի գնահատումը սխալ է իրականացվել:
Ըստ աղբյուրի՝ խնդրի կարգավորման նպատակով տրվել է ևս մեկ անգամ շտկում կատարելու հնարավորություն՝ մինչև 2024 թվականի սեպտեմբերի 6-ը՝ ժամը 18:00-ն:
Համապատասխան խմբագրումներն անհրաժեշտ է կատարել Կրթական տեխնոլոգիաների ազգային կենտրրոնի կողմից սպասարկվող Կրթության կառավարման տեղեկատվական emis.am համակարգում՝ մուտք գործելով համապատասխան դպրոցի էջ:
Այս տարի վերապատրաստման և ատեստավորման ենթակա են՝
- · 5 տարվա շրջափուլով հերթական ատեստավորման ենթակա ուսուցիչները,
- · 1-5 տարվա աշխատանքային փորձ ունեցող ուսուցիչները,
- · առարկայական գիտելիքի իմացության կարիք ունեցող ուսուցիչները,
- · նախորդ տարիներին կամավոր ատեստավորումը չհաղթահարած ուսուցիչների համար ևս անհրաժեշտ է համակարգում նշում կատարել «Ենթակա է ատեստավորման» բաժնում», ասվում է պարզաբանման մեջ:
Նշվում է, որ ուսուցիչների վերապատրաստումն իրականացվելու է մասնագիտական կարիքի գնահատման արդյունքում որոշված մակարդակին համապատասխան:
Առարկայական գիտելիքի իմացության կարիքի արձանագրման դեպքում վերապատրաստումն իրականացվում է երաշխավորված ծրագրի հիման վրա՝ տվյալ առարկայի գծով մանկավարժի որակավորում շնորհող բարձրագույն ուսումնական հաստատության կողմից, իսկ ատեստավորումն իրականացվելու է կամավոր ատեստավորման գործընթացի շրջանակում՝ առարկայական գիտելիքների ստուգման միջոցով:
Նշվում է նաև, որ համակարգում առարկայական գիտելիքի իմացության կարիք ունեցող, նախորդ տարիներին կամավոր ատեստավորումը չհաղթահարած ուսուցիչների կարիքը գնահատվում է «Ոչ», իսկ ըստ մակարդակի վերապատրաստում անցնելու համար գնահատվում են առկա 11 բաժինները: