Կոբախիձեն նախազգուշացրել է, որ ընդդիմությունն ընտրություններից հետո անկարգություններ կհրահրի
1 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ Վրացական ընդդիմությունը կփորձի երկրում անկարգություններ հրահրել հոկտեմբերի 26-ին կայանալիք խորհրդարանական ընտրություններից հետո։ «Արմենպրես»-ի փոխանցմամբ՝ այս մասին հայտարարել է Վրաստանի վարչապետ Իրակլի Կոբախիձեն լրագրողների հետ ճեպազրույցի ժամանակ։
«Ակնհայտ է, որ արմատական ընդդիմությունը հույս չունի հաղթելու ընտրություններում, նրանք պատրաստվում են ընտրություններից հետո սրել իրավիճակը։ Նրանք իրենց բառապաշարից հանել են «Եթե «Վրացական երազանքը» հաղթի» բառերը և անընդհատ ասում են՝ «Եթե «Վրացական երազանքը» կեղծի ընտրությունները»։ Ակնհայտ է, որ նրանք հերթական անգամ չեն ճանաչի ընտրությունների արդյունքները, կփորձեն հարձակում գործել պետական ինստիտուտների վրա և երկրում անկարգություններ իրականացնել», - Կոբախիձեի խոսքերն է մեջբերում ՏԱՍՍ-ը: