2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Հնդկաստանի Ջարխանդ քաղաքում պետական ծառայության ընդունվել ցանկացող անձանց շրջանում անցկացված ֆիզիկական պատրաստվածության քննության ժամանակ առնվազն 12 մարդ է մահացել։ «Արմենպրես»-ի փոխանցմամբ՝ այս մասին հաղորդում է The Economic Times հրատարակությունը։
Հնդկաստանում պետական ծառայությունը համարվում է աշխատանքի ամենագրավիչ վայրը կայունության և լավ աշխատավարձի շնորհիվ, ուստի թեկնածուները շատ են և մանրազնին ընտրություն է անցկացվում:
Մահացածներն այն 500 000 թեկնածուների թվում էին, որոնք ձգտում էին զբաղեցնել մաքսային ծառայության 583 թափուր տեղերը։ Քննություններից մեկի ժամանակ նախատեսված էր վազքով 10 կմ հեռավորություն հաղթահարել սաստիկ տապի պայմաններում:
Երկրի իշխանությունները սեպտեմբերի 3-ին սկսել են այդ միջադեպի քննությունը։ Նահանգի գլխավոր նախարար Հեմանթ Սորենը բժշկական փորձագետներին հանձնարարել է ուսումնասիրել «երիտասարդների վաղաժամ մահը, որպեսզի ապագայում նման դժբախտ դեպքեր չկրկնվեն»:
Հաղորդվում է նաև, որ բազմաթիվ թեկնածուներ քննությունից հետո հոսպիտալացվել են ջրազրկումից առաջացած արյան ցածր ճնշման պատճառով: Ֆիզիկական պատրաստվածության քննություններն այժմ դադարեցվել են։
«Որպես նախազգուշական միջոց ես նաև հանձնարարել եմ դադարեցնել ֆիզիկական թեստերը հաջորդ երեք օրերին: Առավոտյան ժամը 9-ից հետո ոչ մի դեպքում վազք չի անցկացվելու: Բացի այդ, հավաքագրման կենտրոններում կստեղծվեն բուժկետեր, և կլուծվի սննդի հարցը, որպեսզի ոչ ոք քաղցած վիճակում չմասնակցի ֆիզիկական թեստերին», - հավելել է Սորենը։