Ազդարարվեց Ախուրյան համայնքի Կառնուտ, Հովիտ, Բասեն, Ջրառատ բնակավայրերի գազաֆիկացման ծրագրի մեկնարկը

ԳՅՈՒՄՐԻ, 21 ՕԳՈՍՏՈՍԻ,  ԱՐՄԵՆՊՐԵՍ: Ախուրյան համայնքի Կառնուտ, Հովիտ, Բասեն, Ջրառատ բնակավայրերում օգոստոսի 21-ին ազդարարվեց գազաֆիկացման ծրագրի մեկնարկը: 

Ինչպես տեղեկացնում է «Արմենպրես»-ի թղթակիցը, Կառավարություն-համայնք համագործակցությամբ իրականացվող ծրագիրը երկու փուլից է բաղկացած. առաջին փուլում կանցկացվի մայր գազատարը՝ 11 կմ երկարությամբ, երկրորդ փուլում կիրականացվի գազատար ցանցի բաշխումը, որը կմեկնարկի և կավարտվի 2025 թվականին: Ծրագրի ընդհանուր արժեքը 660 միլիոն ՀՀ դրամ է, որից 55 տոկոսը՝ պետության, 45-ը՝ համայնքի ներդրումն է:

Ծրագրի հիմնարկեքին մասնակցեցին Շիրակի մարզպետ Մուշեղ Մուրադյանը, Ախուրյան համայնքի ղեկավար Զավեն Մանուկյանը, ղեկավարի տեղակալներ Կարեն Ներսիսյանը, Կարեն Սերգոյանը, Շիրակի մարզպետի և Ախուրյանի համայնքապետարանի ոլորտային պատասխանատուները, շինարարը և բնակիչներ: 

«Տարածքային կառավարման և ենթակառուցվածքների նախարար Գնել Սանոսյանի հետ քննարկել, հիմնավորել ենք կապույտ վառելիքի անհրաժեշտությունը: Այն կնպաստի, որ բնակիչը սիրով մնա, արարի, աշխատի ու ստեղծի իր գյուղում: Դրա համար անում ենք ամեն ինչ, որ բնակավայրերում ենթակառուցվածքները լիարժեք գործեն: Այս ծրագիրը եղել է մեր հիմնական նպատակներից մեկը և գտնվելու է իմ հսկողության ներքո»,-իր խոսքում նշեց Շիրակի մարզպետ Մուշեղ Մուրադյանը: 

Ախուրյան համայնքի ղեկավար Զավեն Մանուկյանը շեշտեց, որ 4 գյուղերի գազաֆիկացումը խիստ կարևոր և առաջնային է համարում.

«Անգամ Խորհրդային տարիներին այս գյուղերը չեն գազաֆիկացվել և բնակիչների համար այս ծրագիրն անհավատալի էր թվում: Գազաֆիկացման հսկայածավալ այս ծրագիրը ևս մեկ անգամ ապացուցեց, որ Կառավարության և համայնքի ջանքերը համադրելով՝ նույնիսկ անհնարին թվացող ծրագրեր են իրականացվում հեռավոր բնակավայրերում»:

Շինարարությունն իրականացնող ընկերության ինժեներ Կարապետ Սահակյանը վստահեցրեց, որ աշխատանքներն արագ և որակով կատարելու համար ոչ մի խոչընդոտ չկա: Առաջին փուլի համար նախատեսված է 213 օրացուցային օր, որը լիովին կբավարարի աշխատանքն ավարտելու համար:

Արմենուհի Մխոյան