2 րոպեի ընթերցում
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ։ Եվրամիությունը երեք տարում ավելացրել է ռազմական ծախսերն ավելի քան 30 %-ով և գրեթե հասել է ՆԱՏՕ-ի նպատակին, այն է՝ ռազմական ծախսերին տրամադրել ՀՆԱ-ի 2 %-ը։ «Արմենպրես»-ի փոխանցմամբ՝ այս մասին Վաշինգտոնում ՆԱՏՕ-ի գագաթնաժողովի շրջանակներում հայտարարել է ԵՄ արտաքին գործերի և անվտանգության քաղաքականության հարցերով Բարձր ներկայացուցիչ Ժոզեպ Բորելը։
«Ուրախ եմ այստեղ՝ Վաշինգտոնում ասել, որ եվրոպացիներս սկսել ենք վերակառուցել մեր պաշտպանական կարողությունները՝ ավելացնելով մեր պաշտպանական բյուջեները և ընդլայնելով մեր պաշտպանական արդյունաբերությունը.... Որպես օրինակ բերեմ մեկ թիվ՝ վերջին երեք տարիների ընթացքում ԵՄ-ի ընդհանուր ռազմական ծախսերն ավելացել են ավելի քան 30 %-ով: Այս տարի բոլորս միասին կհասնենք միջինը գրեթե ՀՆԱ-ի 2 %-ի, 1,9 %-ի։ Դա բավարար չէ, բայց շատ ավելի լավ է և աճում է», - ասել է Բորելը:
ԵՄ դիվանագիտության ղեկավարը հավելել է, որ ԵՄ երկրները պետք է բարելավեն իրենց բանակների հնարավորությունները, որպեսզի կարողանան պաշտպանել իրենց։
«Ոչ որպես ՆԱՏՕ-ին այլընտրանք․ Եվրոպայի տարածքային պաշտպանության հարցում ՆԱՏՕ-ին այլընտրանք չի կարող լինել, այլ ՆԱՏՕ-ն ավելի ուժեղ դարձնելու և բեռը կիսելու համար», - ասել է Բորելը:
Վաշինգտոնում հուլիսի 9-ին մեկնարկել է ՆԱՏՕ-ի հիմնադրման 75-ամյակին նվիրված գագաթնաժողովը։ Եռօրյա գագաթնաժողովին մասնակցում են բոլոր 32 անդամ երկրների պատվիրակությունները, ինչպես նաև Ավստրալիան, Ճապոնիան, Նոր Զելանդիան, Հարավային Կորեան և Ուկրաինան։