«Համատեղ հայացք Սամցխե-Ջավախեթիին» փառատոնի ընթացքում ավելի քան քառասուն կտավ է ստեղծվել
1 րոպեի ընթերցում
![«Համատեղ հայացք Սամցխե-Ջավախեթիին» փառատոնի ընթացքում ավելի քան քառասուն կտավ է ստեղծվել](http://armenpress.am/resized/480/storage/images/articles/2024/06/27/fnZXqzzFVfu0hzLSwgBE8U0T1KQA1c0FJ5o6sRMK.webp)
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: «Համատեղ հայացք Սամցխե-Ջավախեթիին» խորագրով հայ-վրացական 3-րդ պլեներ-փառատոնն անցկացվել է հունիսի 21-23-ը Ջավախքում:
«Արմենպրես»-ի հաղորդմամբ՝ Հայաստանի նկարիչների միությունը հայտնում է, որ պլեներ-փառատոնը կյանքի են կոչել «Ջավախքին աջակցություն» հիմնադրամը, ՀՀ ԿԳՄՍ նախարարությունը, Հայաստանի նկարիչների միությունը և Վրաստանի նկարիչների լիգան։
Երևանից, Թբիլիսիից և Ջավախքից փառատոնին մասնակցող հայ և վրացի արվեստագետները շրջել են Ջավախքի նշանավոր պատմամշակութային և գեղատեսիլ վայրերում (Աբուլ լեռ, Խերթվիզ բերդ, Փարվանա լիճ և այլն) ու կտավին հանձնել իրենց տպավորությունները:
Փառատոնի արդյունքում ստեղծվել է ավելի քան քառասուն կտավ: Կտավներն առաջիկայում կներկայացվեն ցուցահանդեսով: