1 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Գորիս համայնքի ղեկավար Առուշ Առուշանյանը ընդունել է Ֆրանսիայի Հանրապետության արտակարգ և լիազոր դեսպան Օլիվյե Դեկոտինյին:
«Արմենպրես»-ի հաղորդմամբ՝ Գորիսի համայնքապետարանի «Ֆեյսբուք»-ի էջը տեղեկացնում է, որ հանդիպման ընթացքում երկու կողմերը քննարկել են փոխադարձ հետաքրքրություն ներկայացնող հարցեր, ինչպես նաև Գորիսի զարգացման գործում համագործակցության հեռանկարները:
Ըստ աղբյուրի՝ դեսպանը կարևորել է Ֆրանսիայի հետ գործակցության խորացումը և հույս հայտնել, որ համատեղ նոր նախագծեր կիրականացվեն:
Նշվում է, որ համայնքի ղեկավարը դեսպանի հետ միասին շրջել է Վիենի պուրակում, որտեղ ընթանում են վերակառուցման լայնածավալ աշխատանքներ։ Պուրակում իրականացվում են ենթակառուցվածքների արդիականացման և բարեկարգման աշխատանքներ։ Նախատեսվում է թարմացնել զբոսայգու ճեմուղիները, կանաչապատ գոտիները, նստարանները, լուսավորության համակարգը։ Վերակառուցումից հետո պուրակը կդառնա քաղաքացիների սիրելի հանգստավայրը՝ նոր հնարավորություններ ընձեռելով հաճելի ժամանակ անցկացնելու համար։
Գորիսի համայնքապետարանի տեղեկացմամբ՝ դեսպանի այցի շրջանակներում հունիսի 21-ի երեկոյան տեղի կունենա համերգ Ֆրանսիայի դեսպանատան նախաձեռնությամբ: