Մշակույթ

Ճանապարհորդություն ժամանակի և երաժշտության միջով. Կամերային թատրոնը հանդիսատեսին տարավ Շառլ Ազնավուրի աշխարհ

8 րոպեի ընթերցում

Ճանապարհորդություն ժամանակի և երաժշտության միջով. Կամերային թատրոնը հանդիսատեսին տարավ Շառլ Ազնավուրի աշխարհ

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Շառլ Ազնավուրի ծննդյան 100-ամյակին, որը նշվեց մայիսի 22-ին, արտիստի երկրպագուներն Ազնավուրի և Երևանի կամերային թատրոնի դերասանների հետ ճամփորդեցին ժամանակի և երաժշտության միջով, հաղորդակից դարձան Ազնավուրի հիասթափություններին, համառությանը, նվաճումներին, սիրո տարբեր դրսևորումներին, նորովի բացահայտեցին մեծատաղանդ արտիստին ու ևս մեկ անգամ փաստեցին՝ Ազնավուրը միակն է, անկրկնելին:

Ներկայացման դերակատարներ Ներսես Մարկոսյանին, Դավիթ Աբրահամյանին և Լառա Բաբայանին հաջողվել էր դերասանական գեղեցիկ խաղով, բեմադրական գեղագիտությամբ և ազնավուրյան երաժշտությամբ ստեղծել միջավայր, որը տպավորում էր, տանում շանսոնյեի հարուստ աշխարհ:

OLD08387.jpg (490 KB)

Մինչ ներկայացման մեկնարկը «Արմենպրես»-ի թղթակցի հետ զրույցում բեմադրության ռեժիսոր և դերասան Դավիթ Աբրահամյանն ընդգծում է՝ իրենց համար իսկապես պատիվ է բեմից Ազնավուրին ներկայացնելը:

David.jpg (837 KB)

«Մենք կարող ենք Ազնավուրին դասել Կոմիտասի, Թումանյանի և այլ մեծությունների շարքին, որոնք հայ ժողովրդի համար մեծ նշանակություն ունեն, իսկ Ազնավուրը նաև մեր ժամանակակիցն էր: Մենք հնարավորություն ենք ունեցել տեսնել, մեր կողքին զգալ նրա ֆիզիկական ներկայությունն ու վայելել այն»,-ասում է երիտասարդ ռեժիսորը:

Դավիթ Աբրահամյանն ու Ներսես Մարկոսյանը ֆանատիկորեն են վերաբերվում Ազնավուրին: Խոստովանում՝ եթե այլ տղամարդկանց հեռախոսի էկրանին սիրելի կանանց լուսանկարն է, ապա իրենց հեռախոսների էկրանին՝ Ազնավուրի: «Ազնավուրին ոչ միայն որպես հայի, անհատի պետք է մոտենալ, այլև արտիստի համար հաջողության հասնելու փայլուն օրինակի: Նա ֆենոմենալ բանաձև է ներկայացնում, կյանքի պատմություն. նրա վայրէջքներն ու վերելքները, ընկնելն ու ոտքի կանգնելը թևեր են տալիս յուրաքանչյուր արտիստի: Ցանկացած իրավիճակում, երբ դժվարության եմ հանդիպում, հասկանում, որ ինչ-որ պահի գուցե չհաջողեմ, Ազնավուրն ինձ օգնության է հասնում: Նա ամենաանհրաժեշտ պահերին ինձ խորհուրդ է տալիս, աջակցում: Իմ բոլոր ներկայացումներում Ազնավուրից որևէ երգ, ստեղծագործություն կա․ «Հինգ պատմություն սիրո մասին», «Կուլիսներում կամ թատրոնի անատոմիա» և այլ ներկայացումներում, քանի որ նրան շատ եմ սիրում: Չի կարելի սերը նկարագրել: Երբ անում ես դա, այն արժեզրկվում է»,-հավաստիացնում է Աբրահամյանը:

OLD08068.jpg (651 KB)

Ներկայացման ընթացքում Ազնավուրի երգերի ներքո դերասանները պատմում են նրա կյանքի պատմությունը՝ ծնունդից մինչև նրա վերջին ամուսնությունը, որը հիսուն տարի ձգվեց: Այն վերջինն էր, բայց՝ ամենաամուրը:

«Ձևաչափն այնպիսին է, որ ինչ-որ պահի ես ինձ վրա եմ վերցնում պատմողական հատվածը, Ներսեսը՝ կատարողական, հետո՝ հակառակը: Երկուսս էլ Ազնավուրին ենք մարմնավորում, ուղղակի ես հանդիսատեսի հետ անմիջական շփման միջոցով պատմում եմ Ազնավուրի մասին, բացահայտում դրվագներ, որոնց շատերը, հավանաբար, ծանոթ չեն»,-նշում է դերասանը:

nerses.jpg (659 KB)

Մինչ բեմ բարձրանալը Ներսես Մարկոսյանը, որը հիանալի կերտել էր Ազնավուրի ժեստերը, դիմախաղը, նրան հատուկ արտիստիկ պահվածքը՝ պահպանելով ինքնատիպությունը, խոստովանում է՝ մի քիչ լարված է, քանի որ Ազնավուր խաղալը մեծ պատասխանատվություն է: «Ազնավուրին մոտենալը, նրա երգերը կատարելը և՛ պատիվ է, և՛ պատասխանատվություն: Նրան ասոցացնում եմ սիրո հետ, նա ինքնին սեր էր, ուստի ներկայացման ավարտին բոլորս ասում ենք՝ կեցցե՛ սերը, քանի որ Ազնավուրն ի վերջո գտնում է կյանքի մեծագույն սիրուն՝ Ուլա Թորսելին, և սերը հաղթում է»,-նշում է դերասանը:

Մարկոսյանը ներկայացումը հետաքրքիր է համարում Ազնավուրի կյանքի զարմանալի դրվագների նկարագրությամբ, սիրված երգերի կենդանի կատարումներով: Ստեղծագործական կազմը փորձում է այլ տեսանկյունից ներկայացնել Ազնավուրին, որին շատերը ճանաչում են որպես 20-րդ դարի լեգենդի, հիշեցնել, որ ամեն բան այնքան հեշտ չի տրվել նրան, որքան թվացել է:

OLD08400.jpg (430 KB)

Շառլ Ազնավուրի կյանքում կանայք մեծ դեր են խաղացել: Նա նրանց երգեր, բանաստեղծություններ է ձոնել: Ինչպես ինքն է ասել՝ ոմանց ինքն է լքել, ոմանք իրեն են լքել: Ներսես Մարկոսյանի կինը՝ դերասանուհի Լառա Բաբայանը, մարմնավորել է Ազնավուրի կյանքում մեծ դերակատարություն ունեցած Էդիթ Պիաֆին, որը մեծ հռչակ էր վայելում, երբ Ազնավուրը դեռ պետք է հասներ ճանաչման:

Մարկոսյանն ու Բաբայանն առաջին անգամ չեն համատեղ հանդես գալիս բեմում, սակայն առաջին անգամ են ամուսինների խաղում: Դերասանն ասում է՝ այդ պահին բեմում և՛ ինքն է, և՛ Ազնավուրը: Նա ձգտում է կատարման մաներան նմանեցնել Ազնավուրին, սակայն չհեռանալ նաև Ներսեսից:

«Ինձ բախտ է վիճակվել երեք կերպար կերտել մեկ ներկայացման մեջ: Հավանաբար, ստացվել է, որովհետև երեք կերպարներում էլ հոգեհարազատ բան եմ գտել ու հենվել դրա վրա»,-նշում է Լառա Բաբայանը: Պիաֆից բացի, նա խաղում է Ազնավուրի մոր և կնոջ դերերը: Ասում է՝ Ազնավուրը միշտ ներկա է իրենց տանը. անգամ զգեստապահարանի դուռը բացելիս՝ կարող ենք նրա լուսանկարը տեսնել: «Այս ներկայացմամբ ցանկանում ենք արտահայտել մեր սերը, հայրենասիրությունը, ինչպես, որ Ազնավուրն էր անում: Նա այնքան նուրբ է սիրում, որ հնարավոր չէ նկարագրել, պետք է պարզապես լսել, կարդալ ու սովորել: Գուցե, բառացի չխոստովանի իր սերը, սակայն դա կասի մեղեդիների, ելևէջների միջոցով: Անկախ քեզնից սիրում ես նրան»,-շեշտում է դերասանուհին:

tina.jpg (814 KB)

Նա սեփական մեկնաբանությամբ է կատարում Պիաֆի երգերը: Ակնհայտ է՝ չի ցանկացել կրկնօրինակել Պիաֆին: Կարծում է՝ կարող էր արտաքինով ինչ-որ կերպ նմանվել երգչուհուն, սակայն Պիաֆ լինել չէր կարող: «Փորձել եմ Պիաֆին մատուցել այնպես, ինչպես զգում եմ»,-նշում է Լառան:

Ազնավուրը համառ է եղել, ձգտել փառքի և ծնկի բերել հանդիսատեսին Փարիզում կայացած համերգով, որի ժամանակ մի քանի երգ հուզված կատարելուց հետո երգել է «Je m'voyais déjà»-ն և լսել դահլիճի բուռն ծափահարությունները:

OLD08057.jpg (680 KB)

«Հավանաբար, դա էլ է մեզ ոգեշնչում և ուզում ենք առաջ գնալ: Այնքան հետաքրքիր է. այս պիեսում կան հատվածներ, տեքստեր, որոնք Ներսեսն ասում է, երբ ես կուլիսում եմ: Այնքան գեղեցիկ է ամեն ինչ շարադրված, ասես հենց մեր մասին լինի, ասես ինքներս ենք ապրել այդ հույզերը, գուցե, բառացի չենք շարադրել, բայց զգացել ենք: Մենք անցել ենք այդ ամենի միջով»,-եզրափակում է Լառա Բաբայանը:

Ժամանակին, երբ Ազնավուրն իր հաղթական համերգն ունեցավ Փարիզում, ֆրանսիական թերթերը գրեցին, որ Ֆրանսիան ազնավուրացված է: Մայիսի 22-ին ազնավուրացված էր Երևանի կամերային թատրոնը:

Անժելա Համբարձումյան

Լուսանկարները՝ Հայկ Հարությունյանի

Հայ կի­նո­յի 100-ամ­յա արտադրան­քը՝ մեկ գրքում. կայացել է երկլեզու կատալոգի շնորհանդեսը

Մշակույթ

Հայ կի­նո­յի 100-ամ­յա արտադրան­քը՝ մեկ գրքում. կայացել է երկլեզու կատալոգի շնորհանդեսը

«Քեզ համար, Հայաստան». Շառլ Ազնավուրի 100-ամյակին նվիրված միջոցառումներ են անցկացվել Գյումրիում

Մշակույթ

«Քեզ համար, Հայաստան». Շառլ Ազնավուրի 100-ամյակին նվիրված միջոցառումներ են անցկացվել Գյումրիում

Երևանի «Ոսկե ծիրան» 21-րդ միջազգային կինոփառատոնը հատեց եզրագիծը. հայտնի են մրցանակակիրները

Մշակույթ

Երևանի «Ոսկե ծիրան» 21-րդ միջազգային կինոփառատոնը հատեց եզրագիծը. հայտնի են մրցանակակիրները

Սպարապետ Վազգեն Սարգսյանի մասին գեղարվեստական ֆիլմ է նկարահանվում

Մշակույթ

Սպարապետ Վազգեն Սարգսյանի մասին գեղարվեստական ֆիլմ է նկարահանվում

Փարաջանովն ինձ համար յուրահատուկ է. հայտնի վիզիոներ Տարսեմ Սինխը «Ոսկե ծիրան»-ի շրջանակում հանդիպեց երկրպագուներին

Մշակույթ

Փարաջանովն ինձ համար յուրահատուկ է. հայտնի վիզիոներ Տարսեմ Սինխը «Ոսկե ծիրան»-ի շրջանակում հանդիպեց երկրպագուներին

Ես չեմ ամաչում իմ որևէ ֆիլմից. ականավոր ռեժիսոր Ջաֆար Փանահին երկար դադարից հետո հանդես եկավ մեծ լսարանի առաջ

Մշակույթ

Ես չեմ ամաչում իմ որևէ ֆիլմից. ականավոր ռեժիսոր Ջաֆար Փանահին երկար դադարից հետո հանդես եկավ մեծ լսարանի առաջ

«Արամ» արջուկը Տավուշի սահմանամերձ բնակավայրերի շուրջ 3100 երեխաների նոր ընկերն է

Մշակույթ

«Արամ» արջուկը Տավուշի սահմանամերձ բնակավայրերի շուրջ 3100 երեխաների նոր ընկերն է

Մահացել է ամերիկացի դերասանուհի Շելի Դյուվալը

Մշակույթ

Մահացել է ամերիկացի դերասանուհի Շելի Դյուվալը

«Ոսկե ծիրան»-ին ցուցադրվեց Էդգար Բաղդասարյանի «Յաշան և Լեոնիդ Բրեժնևը» մրցանակակիր ֆիլմը

Մշակույթ

«Ոսկե ծիրան»-ին ցուցադրվեց Էդգար Բաղդասարյանի «Յաշան և Լեոնիդ Բրեժնևը» մրցանակակիր ֆիլմը

Ստրադիվարիուսի և Գվարներիի հնագույն ջութակները ցուցադրվեցին Կապանում

Մշակույթ

Ստրադիվարիուսի և Գվարներիի հնագույն ջութակները ցուցադրվեցին Կապանում

Կինոյի լանդշաֆտը փոխվում է, և դժվար է դառնում ֆիլմեր նկարելը. օսկարակիր Ալեքսանդր Փեյնը Երևանում հանդիպեց արվեստասերներին

Մշակույթ

Կինոյի լանդշաֆտը փոխվում է, և դժվար է դառնում ֆիլմեր նկարելը. օսկարակիր Ալեքսանդր Փեյնը Երևանում հանդիպեց արվեստասերներին

AREMNPRESS

Հայաստան, Երևան, 0002, Մարտիրոս Սարյան 22

+374 11 539818
contact@armenpress.am
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում