2 րոպեի ընթերցում
ԵՐԵՎԱՆ, 25 ՀՈւՆՎԱՐԻ, ԱՐՄԵՆՊՐԵՍ: Իսրայելի էկոնոմիկայի նախարարության ղեկավար Նիր Բարկատը հայտարարել է, որ Իրանն իսրայելական հրթիռային հարձակումների «օրինական թիրախ» է դարձել: «Արմենպրես»-ի փոխանցմամբ՝ այս մասին նախարարը հայտնել է Telegraph-ին տված հարցազրույցում։
«Իրանն օրինական թիրախ է Իսրայելի համար: Նրանք այդ ամենից չեն փախչի։ Օձի գլուխը Թեհրանն է։ Խորհուրդ եմ տալիս որդեգրել Կուբայի հրթիռային ճգնաժամի ժամանակ (ԱՄՆ) նախագահ Քենեդիի ռազմավարությունը: Այն ժամանակ նա փաստացի ասաց, որ Կուբայից եկող հրթիռին կհետևի պատասխան հրթիռը Մոսկվայի ուղղությամբ», - հայտարարել է Նիր Բարկատը:
Իսրայելցի նախարարն այն կարծիքին է, որ Թել Ավիվը պետք է Թեհրանին հասկացնի, որ նա չի խուսափի պատասխանատվությունից Իսրայելի դեմ «խամաճիկներ» օգտագործելու համար։
Նա նաև հայտնել է, որ Հորդանան գետի արևմտյան ափի պաղեստինցիները երբեք հնարավորություն չեն ստանա կրկին աշխատելու Իսրայելում, և նրանց փոխարեն կգան ավելի քան քառորդ միլիոն օտարերկրյա մասնագետներ։
Բարկատը Telegraph-ին նաև հայտնել է, որ Իսրայելը կարող է շարունակել իր գործողությունը Գազայի հատվածում և նույնիսկ նոր ճակատ բացել Լիբանանի հետ սահմանին՝ չնայած օրական ավելի քան 250 միլիոն ԱՄՆ դոլարի ռազմական ծախսերին: