Հրշեջները մարել են Երևանի Վարդաշեն թաղամասում բռնկված հրդեհը

ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Ճգնաժամային կառավարման ազգային կենտրոնը նոյեմբերի 7-ին, ժամը 15։39-ին ահազանգ է ստացել, որ հրդեհ է բռնկվել Վարդաշեն թաղամասի 12-րդ փողոցի տներից մեկին հարակից չբնակեցված շինությունում։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատների երկու մարտական հաշվարկ։

Ըստ աղբյուրի՝ պարզվել է, որ հրդեհը բռնկվել է տներից մեկի մոտակայքում գտնվող խորդանոցում (մոտ 50 քմ)։

Նշվում է, որ հրդեհը մեկուսացվել է ժամը 16։18-ին, մարվել՝ 16։33-ին։ Այրվել են տանիքի փայտե կառուցատարրերը (մոտ 30 քմ) և մոտ 4 քմ կենցաղային աղբ։