Երևան-Գյումրի ավտոճանապարհին բախված երեք ավտոմեքենաներից մեկի ուղևորը հոսպիտալացվել է

ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Շիրակի մարզային փրկարարական վարչության ճգնաժամային կառավարման կենտրոնը հոկտեմբերի 2-ին, ժամը 17:39-ին ահազանգ է ստացել, որ Մարալիկ-Գյումրի ավտոճանպարհին տեղի է ունեցել ՃՏՊ․ կա տուժած։

Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատի մեկ մարտական հաշվարկ։

Ըստ աղբյուրի՝ Պարզվել է, որ Երևան-Գյումրի ավտոճանապարհի 102-րդ կմ-ին բախվել են «Mercedes Benz» (վարորդ՝ Ռ․ Ա․, ծնված 1984 թ.), «Opel» (վարորդ՝ Ա․ Խ․, ծնված 1977 թ.) և VAZ (վարորդ՝ Վ․ Հ․, ծնված 1981 թ.) մակնիշների ավտոմեքենաները. կա տուժած:

Նշվում է, որ փրկարարները VAZ մակնիշի ավտոմեքենայի ուղևոր Ռ․ Ս․-ին (ծնված 1962 թ.) մոտեցրել են շտապօգնության ավտոմեքենային, վերջինս հոսպիտալացվել է բժշկական կենտրոն, որտեղ բժիշկները տուժածի առողջական վիճակը գնահատել են բավարար:

Փրկարարները հոսանքազրկել են ավտոմեքենաները և փակել գազի բալոնների փականները: