Երևանում ընթացող ծանրամարտի Եվրոպայի առաջնությունը լավագույնն է, որ երբևէ տեսել եմ․ Դանիայի հավաքականի մարզիչ

ԵՐԵՎԱՆ, 19 ԱՊՐԻԼԻ, ԱՐՄԵՆՊՐԵՍ: Դանիայի ծանրամարտի հավաքականի մարզիչ Անդերս Բենդիկսը Երևանում անցկացվող ծանրամարտի Եվրոպայի առաջնությունը դասում է ամենաբարձր մակարդակով անցկացվող առաջնությունների շարքին:

«Դեռևս շատ բան չենք տեսել Երևանում, բայց իսկապես վայելում ենք օրերն այստեղ: Մայրաքաղաքը իսկապես գեղեցիկ է: Իսկ ինչ վերաբերվում է կազմակերպչական աշխատանքներին, ապա սա լավագույն առաջնությունն է, որը ես տեսել եմ»,- «Արմենպրես»-ի փոխանցմամբ՝ ասաց նա:

Դանիացի մասնագետի խոսքով` ինքը մասնակցել է 40-50 տարբեր առաջնությունների աշխարհի տարբեր երկրներում, և երևանյան առաջնությունը կազմակերպչական առումով բարձրակարգ է համարում բոլոր կողմերով հանդերձ, մասնավորապես՝ հանրահռչակման, մարզման պայմանների, կամավորների աշխատանքի, հյուրանոցների առումով:

Նա հույս հայտնեց, որ հաջորդ տարի Հայաստանը կընդունի ծանրամարտի աշխարհի առաջնությունը, և այդ դեպքում իրենց համար հաճելի կլինի կրկին վերադառնալը։

Նրա խոսքով՝ Դանիան այնպիսի լավ ցուցանիշներ չունի ծանրամարտում, ինչպիսին ունի Հայաստանը, բայց իրենց նպատակ է ավելի ու լավ շատ փորձ կուտակել ու ծանրամարտում գրանցած արդյունքներով մոտենալ Հայաստանին ու այս մարզաձևից ուժեղ մյուս երկրներին:

Ծանրամարտի Եվրոպայի առաջնությունը ընթանում է Երևանի Կարեն Դեմիրճյանի անվան մարզահամերգային համալիրում ապրիլի 15-23-ը: Անկախ Հայաստանի պատմության մեջ առաջին անգամն է, որ Երևանն ընդունում է նման խոշորամասշտաբ մրցաշար: Ծանրամարտի Եվրոպայի առաջնությունը վարկանիշային է Փարիզի 33-րդ ամառային Օլիմպիական խաղերի համար: Առաջնությանը մասնակցում են մոտ 40 երկրի 500-ից ավել մարզիկներ: Ընդհանուր պատվիրակությունների թիվը գերազանցում է 1000-ը: