Բայդենի, Սունակի և Ալբանիզի հանդիպումից հետո Պեկինը խիստ է արձագանքել AUKUS-ի շրջանակներում ձեռնարկվող հետագա քայլերին
2 րոպեի ընթերցում
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: Ավստրալիայի համար նոր միջուկային սուզանավեր կառուցելու ծրագրերի առնչությամբ Չինաստանը հայտարարել է, որ Վաշինգտոնը, Լոնդոնը և Կանբերան «չափազանց հեռուն են գնացել վտանգավոր ճանապարհով»: Այս մասին հաղորդում է «Արմենպրես»-ը՝ վկայակոչելով Sky News պարբերականին:
Պեկինի այս հայտարարությունից առաջ ԱՄՆ նախագահ Ջո Բայդենի, Միացյալ Թագավորության վարչապետ Ռիշի Սունակի և Ավստրալիայի վարչապետ Էնթոնի Ալբանիզի միջև Սան Դիեգոյում տեղի է ունեցել հանդիպում, որի ընթացքում կողմերը հայտարարել են AUKUS-ի(Ավստրալիա, Միացյալ Թագավորություն, Միացյալ Նահանգներ) գործընկերության հաջորդ փուլի մասին:
Չինաստանի արտգործնախարարության խոսնակը հայտարարել է, որ երեք երկրներն «արհամարհել են» միջազգային հանրության մտահոգությունները: Նշվում է, որ ԱՄՆ-ն, Մեծ Բրիտանիան և Ավստրալիան պնդում են, որ դաշինքը չի մեծացնում միջուկային զենքի տարածման վտանգը:
Եռակողմ հանդիպման ժամանակ Ռիշի Սունակը հայտարարել է, որ սուզանավերի երեք նավատորմերը միասին կաշխատեն՝ Ատլանտյան և Խաղաղ օվկիանոսներն «ազատ, բաց և բարգավաճ պահելու համար»:
Ջո Բայդենն իր հերթին նշել է, որ ԱՄՆ-ն չէր կարող ունենալ «ավելի լավ գործընկերներ», քան Մեծ Բրիտանիան և Ավստրալիան, երբ հարցը հասնում է Խաղաղ օվկիանոսում անվտանգության ապահովմանը: Բայդենը բացասական պատասխան է տվել այն հարցին՝ արդյոք նա մտավախություն չունի, թե Չինաստանն AUKUS-ի գործարքը կդիտարկի որպես ագրեսիա: Սպիտակ տան ղեկավարը նշել է, որ շուտով նախատեսում է խոսել Չինաստանի նախագահ Սի Ծինփինի հետ:
2021 թ. սեպտեմբերին ԱՄՆ-ի նախագահ Ջո Բայդենը, Ավստրալիայի այն ժամանակվա վարչապետ Սքոթ Մորիսոնը և Մեծ Բրիտանիայի այն ժամանակվա վարչապետ Բորիս Ջոնսոնը հայտարարել էին անվտանգության բնագավառում նոր եռակողմ գործընկերության՝ AUKUS-ի ստեղծման մասին: Ծրագրով նախատեսվում է Virginia դասի միջուկային սուզանավեր մատակարարել Ավստրալիային՝ Խաղաղ օվկիանոսում Չինաստանի գործողություններին հակազդելու համար: