1 րոպեի ընթերցում
ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Ընդդիմադիր ուժերի նախաձեռնությամբ ձևավորված «Դիմադրություն» շարժումը բողոքի ակցիաները կշարունակի մայիսի 31-ին: «Արմենպրես»-ի հաղորդմամբ՝ Երևանի Ֆրանսիայի հրապարակում հրավիրված աշխատանքային զրույցից հետո ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը ներկայացրեց մայիսի 31-ի անելիքները:
«Մայիսի 31-ին՝ ժամը 11:00-ին, հավաքվում ենք Ֆրանսիայի հրապարակում, այցելելու ենք տարբեր պետական հաստատություններ՝ ճշգրտելու իրենց դիրքորոշումը Արցախի հարցի վերաբերյալ, ինչը շատ կարևոր է: Արդեն երեկոյան՝ 19:00-ին, կունենանք հանրահավաք»,-ասաց Իշխան Սաղաթելյանն՝ ավելացնելով, որ իրենց պայքարը շարունակելու են:
Ընդդիմադիր «Դիմադրություն» շարժումն արդեն մեկ ամիս է Երևանում, հանրապետության տարբեր քաղաքներում բողոքի ակցիաներ, հանրահավաքներ ու երթեր է անցկացնում՝ Արցախի հարցում իշխանության վարած քաղաքականության դեմ: