Նախատեսվում է կուսակցությունների համար նվազեցնել և դաշինքների համար բարձրացնել ԱԺ անցնելու անցողիկ շեմը

ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: ՀՀ Ազգային ժողովի «Իմ քայլը» խմբակցությունն առաջարկում է խորհրդարան անցնելու համար իջեցնել կուսակցությունների անցողիկ շեմը և բարձրացնել` դաշինքներինը: «Արմենպրես»-ի փոխանցմամբ` ««ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը քննարկելիս, այս մասին ասաց խմբակցության ղեկավար Լիլիթ Մակունցը:

«Նախագծով նախատեսվում է իջեցնել կուսակցությունների համար նախատեսված շեմերը` 5-ից դարձնել 4%-, իսկ դաշինքներինը` բարձրացնել: Մինչև 3 կուսակցությունների դեպքում շեմը դարձնել 8%, իսկ 4 և ավելի կուսակցություններից բաղկացած դաշինքների դեպքում` դարձնել 10 տոկոս: Մենք խրախուսում ենք ավելի շատ կուսակցական համակարգի կայացումը և կուսակցությունների մասնակցությունն ընտրական գործընթացներին»,- ասաց Մակունցը:

Լիլիթ Մակունցը հավելեց, որ նախատեսվում են նաև հայտարարագրման ենթակա ծախսերի ընդլայնում:

««ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը հեղինակել է «Իմ քայլը» խմբակցությունը: Այն ստացել է Վենետիկի հանձնաժողովի և ԵԱՀԿ/ԺՀՄԻԳ-ի դրական կարծիքը: