ԱԺ Հայաստան-Հնդկաստան բարեկամական խմբի ղեկավարը դատապարտեց Գանդիի արձանի կոտրումը և հրկիզումը
2 րոպեի ընթերցում
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: Ազգային ժողովի Հայաստան-Հնդկաստան բարեկամական խմբի ղեկավար, «Իմ քայլը» խմբակցության պատգամավոր Հովհաննես Հովհաննիսյանը դատապարտեց Երևանում տեղադրված Մահաթմա Գանդիի արձանի կոտրումը և հրկիզումը: «Արմենպրես»-ի փոխանցմամբ՝ Հովհաննիսյանն այս հարցին անդրադարձավ խորհրդարանի նիստի ընթացքում:
«Անհարիր եմ համարում հնդիկ ազգի հոր նկատմամբ հնչող անհարգալից, վիրավորական արտահայտությունները, որոնք անընդունելի են: Խստորեն դատապարտում եմ Մահաթմա Գանդիի արձանի կոտրումը և հրկիզումը»,- ասաց Հովհաննիսյանը:
Պատգամավորն ընդգծեց, որ այլատյացությունը Հայաստանում տեղ չունի և որոշ խմբեր փորձ են կատարում սեպ խրել երկու երկրների բարեկամական հարաբերությունների մեջ:
«Մենք դա թույլ չենք տալու: Ուզում եմ վստահեցնել, որ Հայաստանի գործող իշխանությունն ամուր կանգնած է հայ-հնդկական հարաբերությունների դիրքերում»,- նշեց պատգամավորը:
Ապրիլի 29-ին ԶԼՄ-ներում հրապարակումներ էին եղել, որ պղծել են Մահաթմա Գանդիի արձանը: Ոստիկանության Մաշտոցի բաժնի օպերատիվ խումբը դեպքի վայրում պարզել էր, որ վնասել են Հալաբյան և Մարգարյան փողոցների հարակից զբոսայգում տեղադրված Մահաթմա Գանդիի արձանը և պատվանդանը:
Ոստիկանության Երևան քաղաքի վարչության և Մաշտոցի բաժնի քրեական հետախույզներն ու ԱԱԾ Երևան քաղաքի վարչության ծառայողները համատեղ ձեռնարկած միջոցառումներով պարզել են արարքը կատարողի ինքնությունը: Երևան քաղաքի 61-ամյա բնակիչը մայիսի 3-ին բերման է ենթարկվել Մաշտոցի բաժին և տվել խոստովանական ցուցմունք: Կատարվում է նախաքննություն: