398.84
Երևանից Ստեփանակերտ են ուղևորվել 11 ավտոբուսներ՝ տեղափոխելով արցախցիների
1 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Երևանի քաղաքապետարանի հարակից տարածքից դեպի Արցախի մայրաքաղաք Ստեփանակերտ են ուղևորվել 11 ավտոբուսներ՝ տեղափոխելով պատերազմի օրերին Հայաստանում ապաստանած արցախցիներին:
«Արմենպրես»-ի հաղորդմամբ՝ այս մասին տեղեկացնում են Երևանի քաղաքապետարանից՝ հիշեցնելով այս մասով Արցախի Հանրապետության նախագահ Արայիկ Հարությունյանի և Երևանի քաղաքապետ Հայկ Մարությանի պայմանավորվածությունը:
Հետագա փոխադրումների հետ կապված՝ Երևանում գործող Արցախի Հանրապետության օպերատիվ շտաբը հանդես կգա լրացուցիչ հայտարարությամբ։
Քաղաքապետարանի դիմաց կային Արցախ վերադառնալ ցանկացողներ ստեփանակերտցիներ, մարտունեցիներ:
Արցախի Հանրապետության նախագահ Արայիկ Հարությունյանի և Երևանի քաղաքապետ Հայկ Մարությանի հանդիպման արդյունքում պայմանավորվածություն էր ձեռք բերվել, որ նոյեմբերի 13-ից կանոնավոր կերպով ամեն օր անվճար հիմունքներով Երևանի քաղաքապետարանի հարակից տարածքից Ստեփանակերտ կուղևորվեն մարդատար ավտոբուսներ, որոնք Արցախ կտեղափոխեն բոլոր այն քաղաքացիներին, որոնք պատերազմի պատճառով ստիպված ապաստանել էին Երևանում կամ ՀՀ մարզերում:
Բաժանորդագրվեք մեր ալիքին Telegram-ում