2 წუთი კითხვის
უკრაინის პრეზიდენტი ვოლოდიმირ ზელენსკი თურქეთის დედაქალაქ ანკარაში ნატო-ს 36-ე სამიტში მონაწილეობის მისაღებად ჩავიდა.
„არმენპრესის“ ცნობით, ამის შესახებ საინფორმაციო სააგენტო „ანადოლუ“ იტყობინება.
ზელენსკის თვითმფრინავი ანკარის „ესენბოღას“ აეროპორტში დაფრინდა, სადაც მას თურქეთის კულტურისა და ტურიზმის მინისტრი მეჰმეთ ნური ერსოი და სხვა ოფიციალური პირები დახვდნენ.
უკრაინის პრეზიდენტმა განაცხადა, რომ კიევი ნატო-ს სამიტისგან მტკიცე და ეფექტიან გადაწყვეტილებებს ელოდება და ხაზგასმით აღნიშნა, რომ მთავარი პრიორიტეტი ქვეყნის თავდაცვისუნარიანობის განმტკიცებაა.
„წინ მნიშვნელოვანი სამუშაო გველის ანკარაში. ჩვენ ველოდებით ნატო-ს ძლიერ და ეფექტიან სამიტს. ახლა საჭიროა გადაწყვეტილებები, რომლებიც ჩვენს მოქალაქეებს მეტ დაცულობას შეუქმნის, გააძლიერებს ჩვენს თავდაცვით შესაძლებლობებს და კიდევ უფრო მჭიდროს გახდის უკრაინის, ევროპისა და ამერიკის თანამშრომლობას უსაფრთხოების სფეროში“, - დაწერა ზელენსკიმ „ტელეგრამის“ საკუთარ არხზე.
მისი თქმით, სამიტის ფარგლებში დაგეგმილია თავდაცვის სფეროში თანამშრომლობის განვითარებაზე მიმართული ღონისძიებები, ისევე როგორც ორმხრივი შეხვედრები პარტნიორი ქვეყნების ლიდერებთან.
„ნატო-ს თავდაცვის ინდუსტრიის ფორუმი, თითქმის ორი ათეული ორმხრივი შეხვედრა, ახალი შეთანხმებები უპილოტო საფრენი აპარატების შესახებ და სხვა ხელშეკრულებები პარტნიორებთან - ეს ყველაფერი დღის წესრიგშია შეტანილი“, - აღნიშნა უკრაინის პრეზიდენტმა.
ზელენსკიმ ასევე ყურადღება გამახვილა იმაზე, რომ უკრაინა გააგრძელებს აქტიურ მუშაობას საჰაერო თავდაცვის სისტემის გაძლიერების მიმართულებით.
„ახალი სისტემები, მათთვის განკუთვნილი რაკეტები, წარმოების ლიცენზირების საკითხები ჩვენს პრიორიტეტებს შორისაა. ჩვენ კვლავინდებურად თანმიმდევრულად ვიმუშავებთ უკრაინის საჰაერო თავდაცვის შესაძლებლობების გაფართოებაზე“, - განაცხადა მან.