პუტინი შესაძლოა წლის ბოლოს ინდოეთს ეწვიოს

რუსეთის პრეზიდენტის ვლადიმერ პუტინის ვიზიტი ინდოეთში წლის ბოლოს არის დაგეგმილი. როგორც „არმენპრესი“ იუწყება, სააგენტო „რია ნოვოსტსის“ ინფორმაციით, ამის შესახებ მოსკოვში რუსეთის უშიშროების საბჭოს მდივან სერგეი შოიგუსთან შეხვედრისას განაცხადა ინდოეთის პრემიერ-მინისტრის ეროვნული უსაფრთხოების საკითხებში მრჩეველმა აჯით დოვალმა.

„ჩვენ ამჟამად დავამყარეთ ძალიან კარგი ურთიერთობები, რომლებსაც დიდად ვაფასებთ, ეს არის სტრატეგიული პარტნიორობა ჩვენს ქვეყნებს შორის. ვთანამშრომლობთ მაღალ დონეზე... ჩვენ მოხარულები ვიყავით, როდესაც შევიტყვეთ, რომ პრეზიდენტი პუტინი წლის ბოლოს ეწვევა ჩვენს ქვეყანას“, - განაცხადა დოვალმა.

ინდოეთის პრემიერ-მინისტრის ნარენდრა მოდის ვიზიტი მოსკოვში გაიმართა 2024 წლის ივლისში. ვიზიტის ფარგლებში, მათ შორის, ჩატარდა რუსეთ-ინდოეთის 22-ე ყოველწლიური სამიტი. სწორედ მაშინ მოიწვია მოდიმ პუტინი ინდოეთში. 2025 წლის მაისში კრემლის პრესსამსახურმა განაცხადა, რომ მოდიმ ოფიციალურად დაადასტურა მიწვევა და პუტინმა ის მადლიერებით მიიღო.