შევთანხმდით, რომ გულწრფელ და კონსტრუქციულ საუბარს მოსკოვში ჩემი მომავალი ვიზიტის დროს გავაგრძელებთ - ფაშინიანი პუტინთან შეხვედრის შესახებ

ბიშკეკში 1 სექტემბერს სომხეთის პრემიერ-მინისტრ ნიკოლ ფაშინიანსა და რუსეთის ფედერაციის პრეზიდენტ ვლადიმერ პუტინს შორის გამართული შეხვედრის შემდეგ, სომხეთის ლიდერმა ზოგიერთი დეტალი გაასაჯაროვა.

„არმენპრესის“ ცნობით, ფეისბუქის საკუთარ გვერდზე გამოქვეყნებულ ვიდეომიმართვაში ფაშინიანმა განაცხადა:

„ძალიან კარგი შეხვედრა მქონდა რუსეთის ფედერაციის პრეზიდენტ ვლადიმერ პუტინთან. შევთანხმდით, რომ გულწრფელ და კონსტრუქციულ საუბარს მოსკოვში ჩემი მომავალი ვიზიტის დროს გავაგრძელებთ. უნდა აღინიშნოს, რომ სომხეთ-რუსეთის ურთიერთობები ორივე ქვეყნისთვის უკიდურესად მნიშვნელოვანია და ჩვენ ამ ურთიერთობებს დიდი გაფრთხილებით ვეპყრობით. რუსეთის ფედერაციაც, პრეზიდენტ პუტინის ხელმძღვანელობით, გაფრთხილებით ეპყრობა მათ. მაგრამ ასევე უნდა აღინიშნოს, რომ ახალ გარემოში, ახალ პირობებში არსებობს ამ ურთიერთობების ხელახლა ფორმულირების აუცილებლობა და ამ ხელახალი ფორმულირების შედეგად, დარწმუნებული ვარ, ურთიერთობები იქნება უკეთესი, უფრო კონსტრუქციული, უფრო ორმხრივად სასარგებლო და უფრო თბილი“.