388.06
Հայաստանը «էպիկական ճանապարհորդության» թեժ վայրերի ցանկում. eTurboNews-ի անդրադարձը
2 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը, Ֆինլանդիան, Էրիթրեան, Հարավային Կորեան, Ղազախստանը, ըստ զբոսաշրջային փորձագետների, կարող են 2020 թվականին համարվել «էպիկական ճանապարհորդության» հաջորդ թեժ վայրերը: «Արմենպրես»-ի հաղորդմամբ, eTurboNews-ը տեղեկացնում է, որ էպիկական ճանապարհորդությունը տուրիստական ուղղությունների մեջ նոր բաղադրիչ է ֆինանսապես ապահովված անձանց համար, ովքեր ցանկանում են ճեղքել սահմանները և ձեռք բերել եզակի փորձ: Նրանք ցանկանում են ավելին, քան պարզապես արձակուրդը և առաջնորդվում են հույզերով:
«Steppes Travel»- ի գործադիր տնօրեն Ադամ Սեբբայի խոսքով՝ մարդիկ գալիս են իրենց մոտ և հարցնում վայրերի մասին, որոնց վերաբերյալ տեղեկացել են «Instagram»-ում: «Ասում են՝ ցանկանում եմ գնալ այնտեղ, շատ հուզառատ ճանապարհորդություն կլինի»,-նշել է փորձագետը: Նշվում է, որ էպիկական ճանապարհորդության ոճը, որ փնտրում են հաճախորդները, շատ հաճախ բերում է անհատական երթուղու՝ տուրիստական ընկերությունների կողմից հսկայական առաջարկներով:
Մասնագետներն ընդգծում են, որ էպիկական ճանապարհորդության դիմողները փնտրում են նաև կրթական կողմ, հատկապես, երբ նրանք ճանապարհորդում են ընտանիքներով:
Հայաստանը որպես զբոսաշրջային հետաքրքիր ուղղություն են դիտարկում աշխարհի հեղինակավոր զբոսաշրջային պորտալներ, բլոգերներ: Երկիրը ներառված է ամենատարբեր նախընտրություն և ֆինանսական հնարավորություն ունեցողների վարկանիշային ցուցակներում: «Կովկասի զարդ». այսպես էր արտահայտվել Irish Examiner-ը` Հայաստանի զբոսաշրջային գրավչության մասին: Ռուսական «National Geographic Traveler»-ն անդրադարձել էր հենց տեղացիների խորհուրդներով, իսկ ճանապարհորդ-բլոգեր Եվա զու Բեկը Հայաստանն անվանել էր Կովկասի սիրտը:
