«Արմենիա» միջազգային երաժշտական փառատոնի ընթացքում Երևանում կանցկացվի հինգ համերգային երեկո
2 րոպեի ընթերցում
ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: «Արմենիա» միջազգային երաժշտական փառատոնի շրջանակում Երևանը հյուրընկալելու է հեղինակավոր մենակատարների աշխարհի տարբեր երկրներից:
«Արմենպրես»-ի հաղորդմամբ` սեպտեմբերի 22-26-ը մայրաքաղաքում կանցկացվի հինգ համերգային երեկոներ, որոնց ընթացքում Հայաստանի պետական սիմֆոնիկ նվագախմբի հետ հանդես կգան սոպրանո Աննա Կասյանը, դաշնակահարներ Նարե Արղամանյանը, Նիկոլայ Լուգանսկին, Ինգոլֆ Վունդերը, թավջութակահար Ջոնաթան Ռուզմանը և այլք։
Նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի խոսքով` փառահեղ փառատոն է սպասվում: «Մեր երկրում չկա դասական երաժշտության որևէ այլ փառատոն, որի շրջանակում ամեն օր համերգներ լինեն»,-նշեց նա:
Անդրադառնալով մենակատարներին` Սմբատյանն ասաց, որ նրանցից յուրաքանչյուրը մեծ համբավ ունի դասական երաժշտարվեստում: «Այս փառատոնը հետաքրքիր է, ունի լուրջ բովանդակություն և լավ պատմություն»,-ընդգծեց Սմբատյանը:
Ամենամյա փառատոնը հանդիսատեսին է ներկայացնում դասականների երաժշտական ժառանգության, ինչպես նաև ժամանակակից կոմպոզիտորների ստեղծագործությունները։ Հինգ օր շարունակ հնչելու են Չայկովսկու, Պրոկոֆևի, Ռոսսինիի, Մենդելսոնի, Շչեդրինի, Շորի, Կոկժաևի և այլ կոմպոզիտորների գործեր։
Համերգներն անցկացվելու են «Արամ Խաչատրյան» համերգասրահում և Կոմիտասի անվան կամերային երաժշտության տանը:
Փառատոնի կազմակերպիչներն են Հայաստանի պետական սիմֆոնիկ նվագախումբը և Մշակույթի աջակցության եվրոպական հիմնադրամը։