1 րոպեի ընթերցում
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Երևանում ընթացող Եվրոպայի մինչև 19 տարեկանենրի առաջնությունում պայքարը կսկսեն B խմբի թիմերը:
«Արմենպրես»-ի հաղորդմամբ` խմբային փուլի անդրանիկ տուրի առաջին խաղում Նորվեգիայի ընտրանին Ֆուտբոլի ակադեմիայի մարզադաշտում կխաղա Իռլանդիայի թիմի հետ (սկիզբը՝ ժամը 18:45-ին), իսկ Չեխիան ուժերը կչափի Ֆրանսիայի հավաքականի հետ (սկիզբը՝ ժամը 21:00-ին, Հանրապետական մարզադաշտ):
Նախօրեին մեկնարկած մրցաշարի բացման խաղում Հայաստանի ընտրանին 1:4 հաշվով պարտվեց Իսպանիային, իսկ գործող չեմպիոն Պորտուգալիան 3։0 հաշվով առավելության հասավ Իտալիայի նկատմամբ:
Եվրոպայի 2019 թվականի մինչև 19 տարեկանների առաջնությունն այս տարի անցկացվում է Հայաստանում: Հանդիպումները կկայանան Հանրապետական, «Բանանց», ՀՖՖ տեխնիկական կենտրոնի մարզադաշտերում:
8 թիմերը բաժանված են երկու ենթախմբերի` A, B: A խմբում Հայաստանի ընտրանու հետ ընդգրկված են նաև Իսպանիայի, Իտալիայի և Պորտուգալիայի հավաքականները: B խմբում կմրցեն Նորվեգիայի, Իռլանդիայի, Չեխիայի և Ֆրանսիայի ընտրանիները:
Եվրո-2019-ի տոմսերն արդեն վաճառքում են և արժեն 200-500 դրամ:
Վարվառա Հայրապետյան