3 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Հայաստանի ուսանողական մարզական պատվիրակությունը 2019 թվականի հուլիսի 3-14-ը կմասնակցի ամառային 30-րդ Համաշխարհային ունիվերսիադային:
«Արմենպրես»-ի հաղորդմամբ՝ մրցումները տեղի են ունենալու Իտալիայի Նեապոլ քաղաքում:
Մարզական պատվիրակության կազմում ընդգրկված են 14 մարզիկ և 4 մարզիչ: Հայաստանի ուսանող մարզիկները մրցելու են աթլետիկայի, ձյուդոյի, սուսերամարտի, ջրացատկի և թաեքվոնդոյի մարզաձևերում:
Պատվիրակությանը ՀՀ կրթության, գիտության, մշակույթի և սպորտի նախարարությունում հունիսի 28-ին ընդունեցին նախարար Արայիկ Հարությունյանը, նախարարի տեղակալներ Գրիշա Թամրազյանն ու Գևորգ Լոռեցյանը:
Արայիկ Հարությունյանը հաջողություն մաղթեց ուսանող մարզիկներին` նշելով, որ պետությունը կարևորում է ուսանողական սպորտի զարգացումը և առաջիկայում այս ոլորտում լուրջ փոփոխություններ են նախատեսվում:
Նրա խոսքով՝ նախատեսվում է ստեղծել ուսանողական մարզական լիգաներ: «Պետության համար, նաև միջազգային ասպարեզներում, դիրքերն ամրապնդելու առումով, կարևոր են սպորտային հաղթանակները: Միջազգային քաղաքականության մեջ սպորտը կարևոր տեղ ունի և պատահական չէ, որ հզոր պետությունները ձգտում են մասնակցել ամենահզոր ստուգատեսներին և գրավել բարձր տեղեր: Մեր պետությունը ևս կարևորում է սպորտային ձեռքբերումները` այն դիտարկելով միջազգային դիրքերի ամրապնդման միջոց»,- ասաց ՀՀ ԿԳՄՍ նախարարը:
Պատվիրակության ղեկավար, Հայաստանի ուսանողական մարզական ֆեդերացիայի գլխավոր քարտուղար Հովհաննես Գաբրիելյանը նշեց, որ ՀՀ-ի լիարժեք աջակցության շնորհիվ իրենք կկարողանան հավուր պատշաճի ներկայանալ ունիվերսիադային:
«Նախապատրաստվել սկսել ենք գրեթե մեկ տարի առաջ՝ աշխատելով տարբեր ֆեդերացիաների և միջազգային կազմակերպությունների հետ: Ունիվերսիադային ներկա է լինելու շուրջ 10 հազար պատվիրակ մոտ 160 երկրից: Այս տարի մասնակցել ենք նաև ձմեռային ունիվերսիադային՝ 10 հոգանոց պատվիրակությամբ, սակայն չնայած լավ մասնակցությանը մեդալներ չեղան»,- նշեց Գաբրիելյանը:
Այս տարի մրցաշարում ընդգրկված է 18 մարզաձև։ ՀՀ ուսանողական մարզական պատվիրակությունը նախորդ տարիներին երկու տարին մեկ անցկացվող այս միջազգային մրցաշարում ունեցել է մեդալակիրներ: Մասնավորապես վերջին երեք ունիվերսիադիաներում Հայաստանի պատվիրակությունը 17 մեդալ է նվաճել, այդ թվում` 5 ոսկե, 4 արծաթե, 8 բրոնզե մեդալ: Մրցաշարին մասնակից 160 երկրի մեջ Հայաստանը մշտապես ընդգրկված է եղել 30 առավել բարձր արդյունքներ ցույց տված երկրների ցանկում:
ՀՀ ուսանողական մարզական ֆեդերացիան 1995 թվականից հանդիսանում է համալսարանական սպորտի միջազգային ֆեդերացիայի լիիրավ անդամ: