ԱԺ հանձնաժողովը քննարկել է գրագողության դեմ օրենսդրական բարեփոխումներ իրականացնելու հնարավորությունը
2 րոպեի ընթերցում
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: ՀՀ ԱԺ գիտության, կրթության, մշակույթի, սփյուռքի երիտասարդության եւ սպորտի հարցերի մշտական հանձնաժողովն արտահերթ նիստում քննարկել է գրագողության խնդիրը, դրա դեմ օրենսդրական բարեփոխումներ իրականացնելու հնարավորությունը: «Արմենպրես»-ի հաղորդմամբ՝ արտահերթ նիստը գումարվել է մայիսի 27-ին:
Հանձնաժողովի նախագահ Մխիթար Հայրապետյանը ներկայացրել է արտահերթ նիստ հրավիրելու դրդապատճառները: Ըստ նրա՝ քանի որ գրագողությունը մեծագույն չարիք է եւ մարտահրավեր՝ գիտության զարգացմանը, ուստի որոշվել է այս ձեւաչափում քննարկել օրենսդրական հնարավոր բարեփոխումների անհրաժեշտությունը:
Քննարկմանը մասնակցել է Բարձրագույն որակավորման կոմիտեի նախագահ Սմբատ Գոգյանը: Գրագողությունն արմատախիլ անելուն, դրա տարածվածությանն է անդրադարձել Բարձրագույն որակավորման կոմիտեի նախագահ Սմբատ Գոգյանը:
Նա մատնանշել է գրագողության դեմ պայքարի՝ որոշ երկրների փորձը, ներկայացրել երեւույթի դեմ պայքարելու կառույցի մոտեցումները: Սմբատ Գոգյանի տեղեկացմամբ՝ այժմ մշակման փուլում է «Գիտության եւ կրթության մասին» օրենքի նախագիծը, որից էլ ակնկալվում են գրագողության դեմ պայքարի մեխանիզմները: Նա շեշտել է, որ այժմյան օրենսդրական դաշտը թույլ չի տալիս արդյունավետ պայքարելու այդ երեւույթի դեմ: Ըստ բանախոսի՝ հանձնաժողովի հետ համագործակցության արդյունքում կգտնվի պայքարի անհրաժեշտ գործիքակազմ:
Քննարկման ընթացքում մասնակիցները կարեւորել են ոլորտի առողջացմանն ուղղված՝ հանձնաժողովի նախաձեռնությունը՝ նշելով, որ այն սկիզբ է առել ամիսներ առաջ, եւ բացարձակ քաղաքական ենթատեքստ չունի: