388.52
Ալեն Սիմոնյանը Լյուբլյանայում մասնակցել է ՀՀ-Սլովենիա դիվանագիտական հարաբերությունների հաստատման 30-ամյակի միջոցառմանը
2 րոպեի ընթերցում
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: Պաշտոնական այցով Լյուբլյանայում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը հունիսի 3-ին մասնակցել է Հայաստան-Սլովենիա դիվանագիտական հարաբերությունների հաստատման 30-ամյակին նվիրված միջոցառմանը:
Ինչպես «Արմենպրես»-ին տեղեկացրին ՀՀ Ազգային ժողովից, միջոցառմանը բացման խոսքով հանդես են եկել ՀՀ ԱԺ նախագահ Ալեն Սիմոնյանը և Սլովենիայի Հանրապետության ԱԺ նախագահ Ուրշկա Կլակոչար Զուպանչիչը:
«Գործընկերները շնորհավորել են միմյանց երկու երկրների համար այս խորհրդանշական տարեթվի կապակցությամբ և կարևորել երեք տասնամյակների ընթացքում հաստատված ամուր բարեկամական հարաբերությունները:
Ալեն Սիմոնյանն իր խոսքում նշել է, որ Հայաստանի և Սլովենիայի միջև ձևավորվել են բարձր մակարդակի քաղաքական երկխոսություն և ամուր միջխորհրդարանական հարաբերություններ»,- ասվում է հաղորդագրության մեջ:
Ըստ աղբյուրի՝ Հայաստանի խորհրդարանի ղեկավարը բարձր է գնահատել փոխգործակցությունը հատկապես տնտեսական, հումանիտար և մշակութային ոլորտներում:
«Մեր հարաբերությունները վերջին տարիներին առաջընթաց են գրանցել խորհրդարանական դիվանագիտության ոլորտում, ինչի վկայությունն են բարձր մակարդակի շփումներն ու այցելությունները:
Ես խորապես հավատում եմ, որ մեր հարաբերությունները զարգանալու մեծ ներուժ ունեն: Որպես Հայաստանի Հանրապետության Ազգային ժողովի նախագահ՝ ես իմ լիարժեք պատրաստակամությունն եմ հայտնում էլ ավելի խթանելու երկու երկրների կապերը՝ ի շահ մեր ժողովուրդների»,- ասել է ԱԺ նախագահը:
Նշվում է, որ միջոցառմանը շնորհավորական ելույթներով հանդես են եկել նաև ՀՀ-ում Սլովենիայի արտակարգ և լիազոր դեսպան Մատեյա Պրևոլշեկն ու Սլովենիայում ՀՀ արտակարգ և լիազոր դեսպան Աշոտ Հովակիմյանը:
