Սուրեն Պապիկյանը համայնքների ղեկավարներին և մարզպետներին հորդորեց մասնակցել համապետական շաբաթօրյակին
1 րոպեի ընթերցում
ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ: Հայաստանում մարտի 23-ին անցկացվելիք շաբաթօրյակը կարևոր մեկնարկ է մաքուր Հայաստան, մաքուր համայնք ունենալու համար: «Արմենպրես»-ի հաղորդմամբ՝ այս մասին համայնքապետերի հետ հանդիպմանն ասաց ՀՀ տարածքային կառավարման և զարգացման նախարար Սուրեն Պապիկյանը:
Նա համայնքների ղեկավարներին, մարզպետներին հորդորեց մասնակցել շաբաթօրյակին: «Հորդորում եմ, որ այդ օրը դուրս գաք միջհամայնքային ճանապարհներ: Ես անձամբ քայլելու եմ և հավաքելու եմ մայրուղու երկայնքով թափված աղբը»,-ասաց նախարարը:
Նա նշեց, որ շաբաթօրյակից հետո Հայաստանի համայնքների ճանապարհների երկայնքով չենք ունենա այն պատկերը, որն այսօր է:
Հայաստանում մարտի 23-ին անցկացվելիք շաբաթօրյակին համայնքապետերի հետ հանդիպմանն ավելի վաղ անդրադարձել էր նաև ՀՀ վարչապետ Նիկոլ Փաշինյանը՝ շեշտելով, որ այն պետք է կազմակերպվի պատշաճ մակարդակով: