Արարատ Միրզոյանը ինտենսիվ չի զբաղվի քարոզարշավով. «Իմ քայլը» դաշինքի ակտիվ դերակատարը կլինի Նիկոլ Փաշինյանը

ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: ՀՀ առաջին փոխվարչապետի պաշտոնակատար Արարատ Միրզոյանը դեկտեմբերի 9-ին կայանալիք ԱԺ արտահերթ ընտրությունների նախընտրական քարոզարշավով ինտենսիվ չի զբաղվի: «Արմենպրես»-ի փոխանցմամբ` այս մասին Միրզոյանն ասաց նոյեմբերի 14-ին կառավարությունում լրագրողների հետ զրույցում:

«Ես մտադիր չեմ շատ ինտենսիվ քարոզարշավով զբաղվել, ամենայն հավանականությամբ` այդ շրջանում արձակուրդ չեմ վերցնի։ Բոլոր մարդիկ, ովքեր կլինեն նախընտրական ցուցակում ու կլինեն պաշտոնյա, քարոզարշավով կզբաղվեն այնպես, ինչպես սահմանում է ՀՀ օրենսդրությունը: Եթե կլինեն պաշտոններ, որոնց դեպքում անհրաժեշտ է գնալ արձակուրդ` կգնան։ Վարչապետի պաշտոնակատարը շատ ակտիվ ներգրավված կլինի քարոզարշավում։ Նա կլինի շատ ակտիվ դերակատարը։ Գաղտնիք չէ, որ Փաշինյանը չափազանց սիրված է ժողովրդի կողմից ու միամտություն կլինի կարծել, որ որևէ քաղաքական ուժ պետք է իրեն ճոխություն թույլ տա հրաժարվել այդ մարտավարական առավելությունից, որն իրեն հաջողություն է բերում։ Բայց Փաշինյանի կողքին միշտ եղել են մարդիկ շատ լուրջ դերակատարներ են, որոնցից ամեն մեկն իր կարևոր գործն է անում»,- ասաց Միրզոյանը:

Առաջին փոխվարչապետի պաշտոնակատարն անդրադարձավ նաև այն հարցին, թե ում են իրենք դիտարկում, որպես ընդդիմություն:

«Եթե մենք մեծամասնություն կազմենք ու լինենք իշխանություն, ես ընդդիմություն կհամարեմ բոլոր նրանց, ովքեր չեն ընդգրկվի ձևավորվելիք կառավարությունում։ Մեզ որևէ ձևական գրապանային ընդդիմություն երբեք պետք չի եղել ու պետք չի լինելու»,- ասաց նա:

Արարատ Միրզոյանը ընտրությունների արդյունքների վերաբերյալ կանխատեսումներ չարեց, նշելով, որ դա անշնորհակալ աշխատանք է: