2 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Ակցիզային հարկի ավելի արագ տեմպով ավելացման հարցը քննարկվում է:
«Արմենպրես»-ի հաղորդմամբ` նոյեմբերի 2-ին ԱԺ-ում 2019թ. պետական բյուջեի նախագծի քննարկումների ընթացքում այս մասին հայտնեց ՀՀ ֆինանսների նախարարի պաշտոնակատար Ատոմ Ջանջուղազյանը:
«Շահութահարկի, շահաբաժնի և եկամտային հարկի մասով քննարկումների արդյունքում եկել ենք համաձայնության, որ կունենանք սիմետրիկ մոտեցում: Չի քննարկվում ավելացված արժեքի հարկի դրույքաչափի փոփոխություն: Ըստ գնահատականների՝ կա ընկալում, որ այդ դրույքաչափը համապատասխանում է մեր տնտեսության կարիքներին: Հետևաբար, քննարկվում է ակցիզային հարկի հնարավոր ավելացումը: Գործող հարկային օրենսգիրքն արդեն իսկ նախատեսում է ակցիզային հարկի ավելացում: Հիմա ավելի արագ տեմպով պետք է ավելանա այն»,-ասաց Ջանջուղազյանը:
Նրա խոսքով՝ կա ընկալում, որ պետք է վերանայել խաղային ոլորտին վերաբերող կարգավորումները: Այսօր խաղային ոլորտում արդյունքից չի կախված հարկումը: Քննարկվում է արդյունքի վրա հիմնված հարկման համակարգ ունենալու տարբերակը: Նախարարի պաշտոնակատարը նշեց, որ դա անում են հիմա, քանի ներկայում այն տեխնիկապես դարձել է հնարավոր:
Ջանջուղազյանը նշեց, թե ուզում են, որ հարկ վճարողի կողմից ընկալումն ու վերաբերմունքը վերանայվի, պետությունն ընկալվի որպես տվյալ տնտեսության բաժնետեր: Նրա կարծիքով՝ գործունեությունը հնարավոր է լինում իրականացնել նաև պետության ջանքերի շնորհիվ: