368.54
Հանրային վայրերում ծխողը կտուգանվի 50 հազար դրամ, ծխախոտային արտադրանքը գովազդողը՝ 800 հազար. հակածխախոտային օրինագիծը մշակման փուլում է
1 րոպեի ընթերցում
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Հանրային վայրերում ծխելու համար կարող է սահմանվել 50 հազար դրամ տուգանք, ծխախոտային արտադրանքի գովազդի համար՝ 800 հազար: Պաշտոնատար անձը կարող է տուգանվել 200 հազար դրամով, եթե իր տարածքում խախտվի ծխախոտի մասին օրենքը, իսկ նա անհրաժեշտ քայլեր չի ձեռնարկել իրավախախտման կանխարգելման համար:
«Արմենպրես»-ի հաղորդմամբ՝ լրագրողների հետ զրույցում այս մասին նշեց ՀՀ առողջապահության փոխնախարար Լենա Նանուշյանը:
Հակածխախոտային օրինագիծը դեռևս գտնվում է մշակման փուլում:
«Գործող օրենքում ցանկացած գովազդում՝ ծխախոտի թաքնված գովազդ անելու համար տուգանքը 500 հազար դրամ է, իսկ մեկ տարվա ընթացքում երկրորդ անգամ խախտումը կրկնելու դեպքում՝ 1 մլն դրամ: Մշակվող ծրագրում սահմանված է նաև, որ 800 հազար դրամը կկրկնապատկվի երկրորդ անգամ խախտելու դեպքում»,- նշեց Նանուշյանը:
Նրա խոսքով՝ նոր օրինագծով ծխելը կարգելվի բոլոր հանրային տարածքներում և հասարակական վայրերում:
2022 թվականից ուժի մեջ կմտնի նաև առնվազն մեկ պատ և տանիք ունեցող տարածքներում ծխելու արգելքը, իսկ բացօթյա սրճարաններում ծխելը դեռ չի արգելվի:
Բաժանորդագրվեք մեր ալիքին Telegram-ում