2 րոպեի ընթերցում
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: «Երևանյան հեռանկարներ» 19-րդ միջազգային երաժշտական փառատոնին առաջին անգամ Հայաստանում մենահամերգով կներկայանա սոպրանո Լիաննա Հարությունյանը:
«Արմենպրես»-ի հաղորդմամբ` նա հանդես կգա Հայաստանի ազգային ֆիլհարմոնիկ նվագախմբի հետ, գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ: Համերգը տեղի կունենա հունիսի 28-ին Արամ Խաչատրյան համերգասրահում:
Լիաննա Հարությունյանն իր սերնդի ամենահզոր վերդիական սոպրանոներից է: Օժտված լինելով հրաշալի ձայնային տվյալներով՝ երգչուհին հանդես է գալիս հագեցած օպերային երգացանկով՝ անթերի կատարելով Վերդի և Պուչինի, ինչպես նաև ֆրանսիական, ռուսական և կամերային երաժշտության ստեղծագործություններ:
Լիաննա Հարությունյանը ծնվել է Հայաստանում և նախնական կրթություն ստացել Հայաստանում: Երգչուհին ուսումը շարունակել է Փարիզի Բաստիլ օպերայի լիրիկական ստուդիայում: Նրա վերելքի սկիզբն է դարձել 2013 թվականին Լոնդոնի արքայական օպերային թատրոնում կայացած հաղթական դեբյուտը` Յոնաս Կաուֆմանի և Ֆերուչո Ֆուրլանետոյի հետ միասին` Սըր Անտոնիո Պապանոյի ղեկավարությամբ: Լիաննա Հարությունյանը երգում է գլխավոր դերերգեր աշխարհի ամենահեղինակավոր օպերային թատրոններում. Նյու Յորքի Մետրոպոլիտան, Լոնդոնի Արքայական, Սան Ֆրանցիսկոյի, Սիդնեյի, Ցյուրիխի, Փարիզի Բաստիլ, Սանկտ Պետերբուրգի, Ֆրանկֆուրտի, Մադրիդի, Նեապոլի, Մուսկատի, Աթենքի, Ամստերդամի, Համբուրգի, այլոց շարքում:
Նրա մասին անգլիական «The Guardian»-ը գրել է. «Հարությունյանը երգում էր այնպիսի ուժգնությամբ և գեղեցկությամբ, որ թվում էր, թե իր կամ քո սիրտը շուտով կպայթի...»: Համերգային ծրագիրը ներկայացնում է արիաներ և նախերգանքներ. Ջուզեպպե Վերդի, Պիետրո Մասկանի, Ջակինո Ռոսինի, Ֆրանչեսկո Չիլեա, Ջակոմո Պուչինի:
«Երևանյան հեռանկարներ» 19-րդ միջազգային երաժշտական փառատոնը անցկացվում է ՀՀ Վարչապետ Նիկոլ Փաշինյանի հովանու ներքո: Փառատոնի հիմնադիր նախագահը և գեղարվեստական ղեկավարը կոմպոզիտոր Ստեփան Ռոստոմյանն է: