2 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Հայաստանում ներքաղաքական վերջին իրադարձությունների արդյունքում Հայաստանից կապիտալի արտահոսք չի եղել: «Արմենպրես»-ի հաղորդմամբ, այս մասին Սևծովյան տնտեսական համագործակցության կազմակերպության գործարար խորհրդի տնօրենների 58-րդ հերթական նիստի բացմանն ասաց Հայաստանի արդյունաբերողների և գործարարների միության նախագահ Արսեն Ղազարյանը: Նրա խոսքով՝ վերջին մեկ ամսում Հայաստանում սփյուռքահայ կապիտալի ներհոսք է նկատվել: «Բիզնեսը սպասողական վիճակում է փոփոխությունների հանդեպ, և Հայաստանում տեղի ունեցող ներքաղաքական վերջին իրադարձություններից ելնելով գործարար հանրության խնդիրն է հստակ հաղորդագրություններ ուղարկել, որ Հայաստանում իրականացվել է բացառիկ, ունիկալ, սիրո և թավշյա հեղափոխություն, որը նպատակ ունի առաջին հերթին տնտեսության համար բարձրացնել հավասար մրցակցության աստիճանը, վերացնել արհեստածին մենաշնորհները, իսկ սա նշանակում է Հայաստանում ներդրումների համար ավելի բարենպաստ միջավայր կստեղծվի»,-ասաց Ղազարյանը:
Նրա խոսքով՝ միջազգային լրատվամիջոցները Հայաստանում տեղի ունեցող իրադարձություները գնահատում են բացառիկ և Հայաստանը համարում են ժողովրդավարության նոր կղզյակ, մշակույթի նոր արժեքներին կրող: «Այս ոգևորության աստիճանը մենք պետք է կարողանանք արագ կապիտալացնել, որպեսզի նոր գործարարներ հայտնվեն մեր շուկայում՝ զանգվածային ծրագրեր իրականացնելու համար: Մենք շարունակելու ենք կառուցել շուկայական տնտեսություն, ավելի ազատական նորմերով, ավելի հավասար մրցակցությամբ»,-հավելեց նա:
Սևծովյան տնտեսական համագործակցության կազմակերպության գործարար խորհրդի տնօրենների 58-րդ հերթական նիստն անցկացվեց մայիսի 17-ին: Խորհրդի անդամներից նիստին չէին ներկայացել Ալբանիան, Հունաստանը, Մոլդովան, Սերբիան և Ադրբեջանը:
2018-ի հունվարի 1-ից գործարար խորհուրդը ղեկավարում է Հայաստանի արդյունաբերողների և գործարարների միության նախագահ Արսեն Ղազարյանը: