Ռուս քաղաքագետը ԼՂ հարցում Հայաստանի վարած քաղաքականության էական փոփոխություններ չի կանխատեսում

ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Հայ հասարակության ու քաղաքականության մեջ Լեռնային Ղարաբաղի խնդրի շուրջ գոյություն ունի որոշակի կոնսենսուս, որն իշխանության նոր կոնֆիգուրացիայի պայմաններում չի տարբերվի նախորդից: «Արմենպրես»-ի փոխանցմամբ՝ մայիսի 3-ին կայացած մամուլի ասուլիսին նման տեսակետ արտահայտեց ռուս քաղաքագետ Սերգեյ Մարկեդոնովը՝ հավելելով, որ պետք չէ ակնկալել էական փոփոխություններ: «Սա այս օրերի ամենակարևոր հարցերից է: Ադրբեջանի բլոգոլորտը հաճախ արտահայտվում է այն մասին, որ նոր իշխանությունը պատրաստ կլինի ինչ-որ փոխզիջումների կամ զիջումների գնալ: Անկեղծ ասած՝ ես չեմ կարծում, որ իշխանության նոր կոնֆիգուրացիայի դեպքում Ղարաբաղի շուրջ քաղաքականությունը կարող է չափազանց տարբերվել նախորդից: Ես չեմ կարծում, որ Հայաստանի նոր իշխանությունները, եթե ինչ-որ բանից սկսելու են, դա լինի Ղարաբաղի հարցում զիջումը»,-ասաց քաղաքագետը:

Ինչ վերաբերում է Ադրբեջանի գործողություններին, ապա, ըստ Մարկեդոնովի, Ղարաբաղի շուրջ արմատական քայլերի հարցում նրանք զգուշավոր են, և Ադրբեջանը չի կարող իրեն թույլ տալ կտրուկ սրացում մի քանի պատճառով: «Ղարաբաղն, ի տարբերություն, օրինակ, Դոնբասի, չի դիտարկվում որպես «proxy war», այսինքն՝ ավելի մեծ երկրների շահերի բախում՝ ինչպես Ռուսաստանի ու Արևմուտքի միջև: Ընդհակառակը՝ այս հարցում Ռուսաստանի ու Արևմուտքի միջև կան ընդհանրություններ: Եթե դու հակադրվում ես Ռուսաստանին, ապա հակադրվում ես նաև Արևմուտքին ու դա Բաքվում գիտեն»,-նշեց քաղաքագետը։

Բանախոսը նկատեց նաև, որ, եթե Հայաստանում անկայունությունն ավելի լուրջ մակարդակի հասներ, օրինակ, ներքին բախումներ լինեին, ապա Ադրբեջանը կարող էր օգտվել առիթից և շփման գծում դիմել կոշտ քայլերի, ինչը, բարեբախտաբար, տեղի չունեցավ ցույցի խաղաղ հանգուցալուծման արդյունքում:

Բացի այդ, ինչպես Սերգեյ Մարկեդոնովը նկատեց, առջևում Ադրբեջանում հանրապետության օրվա տոնակատարություններն են, բարձրաստիճան հյուրեր են սպասվում եվրոպական երկրներից, ԱՄՆ-ից, հավանաբար նաև Ռուսաստանից: Այդ օրվան ընդառաջ նրանք չէին ցանկանա բացասական ինֆորմացիոն ֆոն ձևավորել:

Ապրիլի 13-ից Երևանում ընթացել են բողոքի ակցիաներ, որոնք գլխավորում էր ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը: Ապրիլի 17-ին նա հայտարարեց առանց բռնության, բաց ձեռքերով «թավշյա հեղափոխության» մեկնարկի մասին: Սկսվեցին զանգվածային անհնազանդության գործողությունները Երևանի տարբեր հատվածներում: Ապրիլի 23-ին հրաժարական տվեց ապրիլի 17-ին Ազգային ժողովի կողմից վարչապետ ընտրված Սերժ Սարգսյանը: Մայիսի 1-ին խորհրդարանը ձախողեց վարչապետի ընտրությունը՝ 56 դեմ և 45 կողմ քվեարկությամբ: ՀՀ վարչապետի ընտրության երկրորդ փուլը տեղի կունենա մայիսի 8-ին՝ ժամը 12:00-ին, Ազգային ժողովի հատուկ նիստում: ՀՀԿ-ն հայտարարեց, որ մայիսի 8-ին կայանալիք վարչապետի ընտրություններին կպաշտպանի պատգամավորների մեկ երրորդի (35 պատգամավոր) կողմից առաջադրված թեկնածուին: Նիկոլ Փաշինյանը կրկին առաջադրվել է որպես ՀՀ վարչապետի թեկնածու, «Ծառուկյան» խմբակցությունը կպաշտպանի նրա թեկնածությունը: