2 րոպեի ընթերցում
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Գրականագետ Դավիթ Գասպարյանը պնդում է, որ հստակ գիտի, թե որտեղ է հուղարկավորված հայ մեծ գրող Եղիշե Չարենցի աճյունը: «Արմենպրես»-ի հաղորդմամբ՝ մարտի 12-ին՝ գրողի ծննդյան 121-ամյակին ընդառաջ լրագրողների հետ հանդիպմանն այս մասին ասաց Գասպարյանը:
«Չարենցի գերեզմանի հետքի վրա ենք դուրս եկել մի քանի վկայությունների շնորհիվ: Ականատեսի փաստմամբ՝ գրողին թաղել են Էջմիածին տանող ճանապարհի մոտակայքում գտնվող շինություններից մեկի բակում: Այն վարկած չէ, այլ իրողություն: Այդ տեղի մասին ասել է մի մարդ, ով մասնակցել է թաղմանը: Ականատեսը պատմել է, որ երկու հոգի պարկի մեջ գցած Չարենցին բանտից բերել են, իրեն էլ կանչել՝ փոս փորելու և զգուշացրել, որ ոչ ոքի այդ մասին չպատմի: Նա լռել էր, շատ ժամանակ հետո խոստովանել»,-ասաց Գասպարյանը:
Գրականագետը պատմում է, որ դեռ 1988-ին որոնումներն են կատարել, սակայն ինչ-ինչ պատճառներով որևէ նյութական բան չեն կարողացել գտել: Նրա խոսքով՝ ականատեսը պատմել էր, որ այդ հատվածում ընկույզի և դեղձի ծառեր կային, որոնումների ընթացքում տեսել են, որ ծառեր չկան, սակայն եղել են դրանց բները:
«Սակայն որոնումներին, Չարենցի գերեզմանը հայտնաբերելուն դեմ էին գրողի հարազատները: Եվ քանի որ դա ժառանգական իրավունքի պես մի բան է, ես դադարեցրի իմ որոնումները»-նշեց Գասպարյանը: