Պարգև արքեպիսկոպոս Մարտիրոսյանը Սերժ Սարգսյանին համարում է ռազմական իրավիճակին ամենալավ տիրապետող անձը
1 րոպեի ընթերցում
ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Արցախի թեմի հոգևոր առաջնորդ Պարգև արքեպիսկոպոս Մարտիրոսյանը կարծում է, որ ՀՀ Նախագահ Սերժ Սարգսյանից լավ ոչ ոք չի տիրապետում ներկայիս ռազմական և բանակի իրավիճակին: «Արմենպրես»-ի հաղորդմամբ՝ Պարգև Սրբազանը նման կարծիք հայտնեց մարտի 10-ին լրագրողների հետ զրույցում:
«Սերժ Սարգսյանը մեծագույն փորձառություն ունեցող մարդ է, ով Արցախյան շարժման առաջին օրից մինչև հիմա գտնվում է կարևորագույն պաշտոններում: Եվ այսօր ՀՀ Զինված ուժերի Գերագույն գլխավոր հրամանատարն է: Կարծում եմ՝ նրանից լավ ոչ ոք չի տիրապետում ռազմական և բանակի իրավիճակին»,-ասաց Պարգև Սրբազանը:
Նրա կարծիքով՝ ԼՂ հիմնախնդրի կարգավորման բանակցությունները ևս տեղի են ունենում նրա միջոցով, հետևաբար Սերժ Սարգսյանից լավ մասնագետ այդ հարցում չկա:
«Մեր անվտանգության երաշխավորը մեր ժողովուրդը, բանակը և իշխանությունն են միասին»,-եզրափակեց Պարգև արքեպիսկոպոս Մարտիրոսյանը: