2 րոպեի ընթերցում
ԳԱՎԱՌ, 8 ՓԵՏՐՎԱՐԻ, ԱՐՄԵՆՊՐԵՍ: Գեղարքունիքի մարզում ավարտվեց վոլեյբոլի մարզպետի գավաթի խաղարկության տարածքային փուլը, որին մասնակցեցին մարզի Մարտունու, Գավառի, Վարդենիսի եւ Սեւանի տարածքների երկու տասնյակից ավելի թիմեր:
Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի կրթության, մշակույթի եւ սպորտի վարչությունից, մրցաշարի տարածքային փուլն ի հայտ բերեց մարզային փուլի հաղթողներին, ովքեր եւ առաջիկայում կվիճարկեն մարզպետի գավաթը:
Մրցաշարը նվիրվում է Հայոց բանակի կազմավորման 26-րդ տարեդարձին:«Մրցումներն անցան լարված պայքարում: Վարդենիսի տարածքում մարզային փուլի ուղեգիր նվաճեց Ակունք գյուղի, Մարտունու տարածքում՝ Մարտունի քաղաքի, Սեւանի տարածքում՝ Սեւան քաղաքի, Գավառի տարածքում՝ Գեղարքունիք գյուղի թիմը: Ճամբարակի տարածքի համայնքները մրցաշարին մասնակցելու հայտեր չներկայացրին: Եզրափակիչ մրցաշարը տեղի կունենա փետրվարի 9-ին, Գավառի թիվ 3 հիմնական դպրոցի մարզադահլիճում:Եզրափակիչ խաղերը կանցկացվեն շրջանաձեւ մրցակարգով:
Հաղթող թիմը կպարգեւատրվի Գեղարքունիքի մարզպետի գավաթով, մեդալներով ու հավաստագրերով»,-ներկայացրեց Գեղարքունիքի մարզպետարանի աշխատակազմի ԿՄՍ վարչության մշակույթի եւ սպորտի բաժնի վարիչ Գեղամ Չարվադարյանը:
Խոսրով Խլղաթյան