Մթերումների վճարման նպատակով 16 վերամշակող ընկերություն օգտվել է վարկերի սուբսիդավորման ծրագրից
3 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Խաղող և պտուղ-բանջարեղեն վերամշակող 16 ընկերություն շուրջ 1.2 միլիարդ դրամի սուբսիդավորվող վարկ է ստացել մթերումների դիմաց վճարումներ կատարելու համար:
«Արմենպրես»-ի փոխանցմամբ` այս մասին լրագրողների հետ հանդիպմանը տեղեկացրեց ՀՀ գյուղատնտեսության նախարարի տեղակալ Ռոբերտ Մակարյանը: Նրա խոսքով` ծրագրի պիլոտը մեկնարկել էր ընթացիկ տարվա սեպտեմբերին: «Ոլորտի նորամուծություններից էր ագրովերամշակման ոլորտում մթերման վարկերի սուբսիդավորումը: Ծրագրով մինչև 12 տոկոս վարկավորման դեպքում մինչև 9 տոկոսը սուբսիդավորվում է պետության կողմից, արդյունքում վերամշակողը ստանում է 3-տոկոսանոց վարկ: Այս գումարները ուղղվում են միայն մթերումներին: Պայմանագրով 10-օրյա ձևակերպումներից հետո գումարը ստանում է գյուղացին»,-ասաց փոխնախարարը: Նա նշեց, որ ծրագրի նախապայամններից է նախապես պայմանագրերի կնքումը, որով գյուղացին ունենում է բերքի երաշխավորված իրացում, իսկ վերամշակողը՝ հումքի բազա: Փոխնախարարի խոսքով` գալիք տարվա սկզբին արդեն սկսելու են աշխատել վերամշակող ընկերությունների հետ, որ հաստատեն ցանկը, ինչն էլ գյուղացիական տնտեսությունների համար ուղենիշ կլինի: «Նրանք կիմանան, թե որ կազմակերպությունն ինչ չափով ինչ ապրանքների գծով է մթերում իրականացնելու և վարկավորվելու, որպեսզի իրենց բերքը չհանձնեն անբարեխիղճ ընկերություններին, և չգոյանան պարտքեր»,-ավելացրեց նա:
Ռոբերտ Մակարյանը հիշեցրեց, որ անցած շաբաթ ՀՀ կառավարությունը հաստատել է ծրագիրը` շուրջ 18 միլիարդ դրամի վարկային միջոցների տրամադրմամբ: «Այս ծրագրի հաջող իրականացման դեպքում մենք այլևս չենք ունենա անընդհատ չարչրկվող պարտքերի թեման, երբ վերամշակողները գյուղացիներից գնում էին ապրանքը և վճարումներ չէին իրականացնում մեկ, երկու, երբեմն էլ երեք տարի: Գործընթացը ճիշտ իրականացնելու դեպքում գումարների վերադարձի խնդիրը կլուծենք»,- հույս հայտնեց Ռոբերտ Մակարյանը:
Այս տարի առավելագույնը շահառուներին տրամադրվել է մինչև 150 միլիոն դրամի չափով վարկ, հաջորդ տարվանից, ըստ Մակարյանի, մեկ վերամշակողը կարող է ձեռք բերել մինչև 1 միլիարդ դրամի վարկ:
Ծրագրում ներգրավված են 15 ֆինանսական կառույցներ`բանկեր, ունիվերսալ վարկային կազմակերպություններ: Դաշտը բաց է, այլ ֆինանսական կառույցներ ևս կարող մասնակցել ծրագրին: