Նյու Յորքի «Մետրոպոլիտան» թանգարանում «Հայաստան» խորագրով ցուցահանդես կբացվի

ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: Նյու Յորքի «Մետրոպոլիտան» թանգարանում 2018թ-ի սեպտեմբերի 21-ին կբացվի «Հայաստան» խորագրով ցուցահանդեսը, որը բաց կլինի մինչև 2019թ-ի հունվարի 13-ը:

Ինչպես հաղորդում է «Արմենպրես»-ը, ցուցահանդեսում ներկայացված կլինեն Բոստոնի Ամերիկայի հայկական թանգարանի մի շարք ցուցանմուշներ, այդ թվում՝ նկարազարդ ձեռագրեր:

Ցուցահանդեսում ներկայացված ցուցանմուշները կներկայացնեն Հայաստանի քրիստոնեացման գործընթացը, ինչպես նաև հայկական արվեստի զարգացումը միջնադարում և դրա տարածումն աշխարհում: Այս թեմաներին առնչվող քննարկումները թանգարանում կվարի դոկտոր Հելեն Էվանսը:

Ցուցահանդեսում ներկայացված կլինեն նաև լուսանկարիչ Հրայր Խաչերերյանի խաչքարների լուսանկարների շարքը, որոնց վերաբերյալ գիրքը լուսանկարիչը կներկայացնի «Մետրոպոլիտան»-ում: Ցուցահանդեսի պաշտոնական լուսանկարիչը ևս կլինի Հրայր Խաչերերյանը: