2 րոպեի ընթերցում
ԳԱՎԱՌ, 22 ՆՈՅԵՄԲԵՐԻ, ԱՐՄԵՆՊՐԵՍ: Գավառ քաղաքի Հացառատ թաղամասում «Ասիական զարգացման բանկի» տրամադրած վարկային միջոցների հաշվին մեկնարկել է թիվ 2 միջնակարգ դպրոցի նորակառույց շենքի շինարարությունը:
Ինչպես «Արմենպրես»-ին տեղեկացրեց շինարարական աշխատանքներն իրականացնող «Ագաթ-777» կազմակերպության աշխղեկ Կոլյա Մարտիրոսյանը, շինարարությունը մեկնարկել է 2017 թվականի նոյեմբերի 9-ից եւ ավարտի կհասցվի առաջիկա երկու տարվա ընթացքում:
«Անցած օրերի ընթացքում կատարել ենք հողային աշխատանքներ եւ նախահիմքերի հիմնատակերի նախապատրաստում:Կառույցն ունենալու է եռահարկ երեք մասնաշենք եւ միահարկ մեկ մասնաշենք՝ մարզական եւ նիստերի դահլիճի համար:2074 քառակուսի մետր մակերես ունենալու են եռահարկ երեք մասնաշենքերը, 816 քառակուսի մետր մակերես՝ մարզական եւ նիստերի դահլիճը: Դպրոցը կառուցվելու եւ վերազինվելու է արդի միջազգային կրթական չափորոշիչներին համապատասխան, նախկին դպրոցի վթարային շենքի տեղում, որն ամբողջությամբ քանդվել ու շինանյութը հեռացվել է»,-ներկայացրեց Կոլյա Մարտիրոսյանը:
Գավառի թիվ 2 միջնակարգ դպրոցի տնօրեն Անահիտ Հակոբյանի հավաստմամբ՝ նախորդ տարվա աշնանից դպրոցը տեղափոխվել է Գավառի ավտոդպրոցի շենքի տարածք, որտեղ դասաժամերի անցկացման համար ստեղծվել են բոլոր անհրաժեշտ պայմանները: