Գյումրիում ևս մեկ տնակաբնակ ընտանիքի հանձնվեց սոցիալական բնակարան

ԳՅՈՒՄՐԻ, 11 ՆՈՅԵՄԲԵՐԻ, ԱՐՄԵՆՊՐԵՍ: Գյումրիում 2 անչափահաս երեխա ունեցող ընտանիքն այլևս տնակում չի բնակվի: «Գյումրին առանց տնակների» հիմնադրամի նախաձեռնությամբ ևս մեկ տնակաբնակ ընտանիքի հանձնվեց սոցիալական բնակարան:

Երեք սենյականոց, կոմունալ բոլոր հարմարություններն ունեցող բնակարանը ձեռք է բերվել ավստրալահայ հասարակական ու մշակութային գործիչ, Հայ Առաքելական եկեղեցու Ավստրալիայի և Նոր Զելանդիայի թեմական խորհրդի փոխնախագահ, Ստեփան Գրքաշարյանին և նրա տիկնոջը՝ Հիլդա Գրքաշարյանին անձնական միջոցներով:

Ինչպես «Արմենպրես»-ին տեղեկացրեց «Գյումրին առանց տնակների» հիմնադրամի գործադիր տնօրեն Ղարիբ Հարությունյանը, ընտանիքի ընտրությունը ևս բարերարներինն է եղել: Մայրը՝ Ռեգինա Առուստամյանն ու իր երկու անչափահաս զավակները՝ ութամյա Կարինեն և յոթ տարեկան Աշոտը, մինչ այս ապրել են թիթեղյա տնակում՝ զուրկ ամեն տեսակի հարմարությունից:

Ընտանիքի՝ անօթևանի կարգավիճակ չունենալն էլ պատճառ էր երիտասարդ կնոջը հուսահատվելու: Նոր տան հարմարություններից ամենաշատն ուրախացել էր 7 տարեկան Աշոտը, ով, ուրախությամբ առաջին իսկ հնարավորությունը օգտագործելով, ընտրեց իր սենյակը, որտեղ ամեն ինչ իր համար նորություն էր: Բնակարանը նորոգված է ու Ռեգինան արդեն իսկ պատրաստ է տեղափոխվելու քարե բնակարան:

Ռեգինայի ընտանիքը Գյումրի է տեղափոխվել 29 տարի առաջ Բաքվից, հայրը՝ Ղարիբ Արուստամյանը զոհվել է Արցախի ինքնապաշտպանության ժամանակ: Նախ` մայրիկի հետ, ապա արդեն ամուսնու հարազատների հետ է տնակում ապրել, իսկ, երբ ընտանեկան խնդիրների պատճառով ընտանիքը բաժանվել է, Ռեգինան կրկին առանձին տնակում է ապրել արդեն երկու զավակների հետ: Ընտանիքը բնակարան տեղափոխվեց նոյեմբերի 10-ին:

Ուրախությանը ներկա էին և այդ ընտանիքի հետ այդ ուրախությունը կիսեցին «Գյումրին առանց տնակների» հիմնադրամի հոգաբարձուների խորհրդի նախագահ Միքայել եպս․ Աջապահյանը, խորհրդի անդամներ, Շիրակի փոխմարզպետ Հարություն Արշակյանը և բարերարների վստահված անձ՝ Սարգիս Համբարձումյանը: