Նոյեմբերի 5-ին Շիրակի մարզի Մարմաշեն, Անի և Ախուրյան համայնքերում ակնկալվում են մրցակցային ՏԻՄ ընտրություններ
1 րոպեի ընթերցում
ԳՅՈՒՄՐԻ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Նոյեմբերի 5-ին Շիրակի մարզի Մարմաշեն, Անի և Ախուրյան համայնքերում կայանալու են ՏԻՄ ընտրություններ: Վերջիններս խոշորացվող համայնքներ են, այդ իսկ պատճառով, արդեն իսկ հստակ է՝ պայքարը թեժ է լինելու:
Ինչպես «Արմենպրես»-ին տեղեկացրեց Շիրակի մարզպետարանի աշխատակազմի տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանը, Մարմաշենում առաջադված է 4 թեկնածու, իսկ Անիում ու Ախուրյանում՝ վեցական:
«Այս ընտրույթուններով 40 համայնքների միավորումով ձևավորվում է երեք համայնք, հենց սրանով էլ պայմանավորված ընտրությունները մրցակցային են: Համայնքների միավորումով, աշխատող համայնքապետի համար, գործելու լայն դաշտ է ստեղծվում, բայց չաշխատող համայնքապետի համար՝ խնդիրները բազմապատկվելու են»,- «Արմենպրես»-ի հետ զրույցում նշեց Արամ Անտոնյանը:
Առաջադրված թեկնածուների մեջ չկա կին թեկնածու, շատ են համայնքերի նախկին ղեկավարները՝ միայն Մարմաշենում 4 թեկնածուից 3-ը տարբեր տարիների եղել են համայնքապետեր, մյուս 2 համայնքում նույնպես կան նախկին համայնքապետեր: Ներկայում ընթացքի մեջ է քարոզարշավը: