1 րոպեի ընթերցում
ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: ՈՒԵՖԱ-ի Չեմպիոնների լիգայի խաղարկության խմբային փուլի երկրորդ տուրի արդյունքներով շաբաթվա լավագույն ֆուտբոլիստ է ճանաչվել Մադրիդի «Ռեալ»-ի պորտուգալացի հարձակվող Քրիշտիանու Ռոնալդուն: Ինչպես հաղորդում է «Արմենպրես»-ը, այս մասին հայտնում է ՈՒԵՖԱ-ի պաշտոնական կայքը:
Բացի Ռոնալդուից Չեմպիոնների լիգայի շաբաթվա լավագույն ֆուտբոլիստի կոչմանը հավակնում էին ֆրանսիական ՊՍԺ-ի հարձակվող Նեյմարը, անգլիական «Մանչեսթեր Յունայթեդ»-ի հարձակվող Ռոմելու Լուկակուն, իտալական «Յուվենթուս»-ի հարձակվող Գոնսալո Իգուաինը, անգլիական «Տոտենհեմ»-ի հարձակվող Հարի Քեյնը, պորտուգալական «Պորտու»-ի հարձակվող Վենսան Աբուբաքարը և անգլիական «Մանչեսթեր Սիթի»-ի կիսապաշտպան Քևին դե Բրույնեն:
Քվեարկության արդյունքներով պորտուգալացի հարձակվողն առաջ է անցել բոլոր մրցակիցներից: Չեմպիոնների լիգայի խաղարկության խմբային փուլի երկրորդ տուրում «Ռեալ»-ը մրցակցի հարկի տակ 1-3 հաշվով պարտության մատնեց Դորտմունդի «Բորուսիա»-ին: Այդ խաղում Ռոնալդուն դարձավ դուբլի հեղինակ: