1 րոպեի ընթերցում
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Այսօր Ն.Ս.Օ.Տ.Տ. Ամենայն Հայոց կաթողիկոս Գարեգին Բ-ն այցելել է ՀՀ վարչապետ Սերժ Սարգսյանին: Ինչպես «Արմենպրեսե-ին տեղեկացրին ՀՀ կառավարության տեղեկատվության եւ հասարակայնության հետ կապերի վարչությունից, Վեհափառ Հայրապետը Մայր Աթոռ Սուրբ Էջմիածնի հայրապետական օրհնությամբ եւ շնորհավորանքներով է սկսել հանդիպումը՝ հույս հայտնելով, որ ՀՀ կառավարության ղեկավարի բարձր ու պատասխանատու աշխատանքում Սերժ Սարգսյանն իր փորձառությունն ու կարողությունները մեծ նվիրումով ի սպաս կդնի ի շահ մեր ժողովրդի եւ պետության: Ամենայն Հայոց կաթողիկոսը վարչապետին մաղթել է քաջառողջություն եւ հաջողություններ՝ կառավարության առջեւ դրված խնդիրների լուծման ճանապարհին: Շնորհակալություն հայտնելով հայրապետական բարեմաղթանքների համար՝ Հ վարչապետ Սերժ Սարգսյանը վստահեցրել է, որ ՀՀ կառավարությունն այսուհետ եւս կշարունակի եկեղեցի-պետություն հարաբերություններն ամուր հիմքերի վրա պահելու եւ ի նպաստ մեր պետության ու ժողովրդի այն ծառայեցնելու իր որդեգրած քաղաքականությունը: Հանդիպման ժամանակ կողմերն անդրադարձել են եկեղեցի-պետություն հարաբերություններին եւ համագործակցությանը վերաբերող մի շարք հարցերի: