2 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Ուզլովսկի քաղաքի մոտ տեղի ունեցած Մոսկվա-Երևան երթուղու ուղևորատար ավտոբուսի վթարից տուժած վերջին վիրավորները կժամանեն Հայաստան դեկտեմբերի 27-ին: Այստեղ կշարունակվի նրանց վերականգնողական ապաքինումը: «Արմենպրես»-ի տեղեկացմամբ` լրագրողներին այս մասին հայտնեց ՀՀ առողջապահության նախարար Արմեն Մուրադյանը: «Վթարից տուժած բոլոր հիվանդների բուժումը գտնվել է Հայաստանի և Ռուսաստանի առողջապահության նախարարների անմիջական հսկողության ներքո: Վիրավորների հարցը քննարկվել է ՌԴ նախարարի հետ, փոխնախարարների մակարդակով վերահսկվել նրանց ապաքինման ընթացքը: Վերջին վիրավորները, որ իրականում շատ բարդ վիրահատություններ տարան, իսկ նրանից մեկի անմիջապես կյանքին սպառնացո վտանգ կար, այս կիրակի կժամանեն Հայաստան»,- հայտնեց Մուրադյանը` հավելելով, որ այդ պատմության չարաբաստիկ էջը կարելի է փակված համարել:
Վթարից տուժած 4 ՀՀ քաղաքացիները, որ դեռ գտնվում են Ռուսաստանի Դաշնությունում, իրենց վերականգնողական բուժումն այստուհետ կստանան հայրենիքում:
Նոյեմբերի 3-ին` ժամը 04.44-ին ՌԴ ԱԻՆ ԱՃԿԿ-ից տեղեկատվություն է ստացվել, որ ժամը 03.08-ին Մ-4 դաշնային ավտոճանապարհի 220-րդ կմ-ում՝ Տուլայի տարածաշրջանի Ուզլովսկի շրջանի Իլյինկա գյուղի մոտակայքում Մոսկվա-Երևան երթուղու «Կինգ Դելյուքս» ՍՊԸ տրանսպորտային ընկերությանը պատկանող «Higer» մակնիշի 510 OP 61 պետհամարանիշով ավտոբուսը դուրս էր եկել երթևեկելի մասից և շրջվել: ՃՏՊ-ի հետևանքով զոհվել է 8 քաղաքացի, տուժել 43 ՀՀ քաղաքացի: