Հովունիի խոնարհված եկեղեցում մատուցվեց Աստվածածնի գոտու տոնին նվիրված պատարագ

ԳՅՈՒՄՐԻ, 30 ՕԳՈՍՏՈՍԻ, ԱՐՄԵՆՊՐԵՍ: Շիրակի մարզի թեմակալ առաջնորդի ձեռամբ օգոստոսի 30-ին պատարագ մատուցվեց Հովունի համայնքում: Հայ առաքելական սուրբ եկեղեցու՝ Սուրբ Մարիամ Աստվածածնին նվիրված յոթ տոներից մեկին`Աստվածամոր գոտու հայտնվելու տոնին նվիրված պատարագը Շիրակի թեմի առաջնորդ Միաքայել եպիսկոպոս Աջապահյանը մատուցեց գյուղի խոնարհված եկեղեցում:

Գոտու գյուտի տոնը Տիրամորը պատկանած իրերի հայտնությանը նվիրված տոներից է:Արկադիոս կայսեր օրոք (395-408թթ.) Երուսաղեմում գտնվում է Սուրբ Աստվածածնի գոտին: Այն հանդիսավորությամբ տեղափոխվում է Կ. Պոլիս և պահվում Սուրբ Աստվածածին անունով նորակառույց եկեղեցում: Հայ եկեղեցին մինչև 18-րդ դարն այս տոնը չի նշել: Սիմեոն Ա Երևանցի կաթողիկոսը 1774թ-ին հրատարակած Տոնացույցում ընդգրկել է այս տոնը, որը յոթ օրվա շարժունակությամբ տոնվում է օգոստոսի 26-ից սեպտեմբերի 1-ը հանդիպող կիրակի օրը: Ի դեպ, Հովունի համայնքի եկեղեցին կրում է Աստվածածնի անունը: 1820-1860 ականներին կառուցված եկեղեցին հիմնականում վնասվել է երկրաշարժերի հետևանքով:

Ինչպես «Արմենպրես»-ին տեղեկացրեց Մարմաշենի հովվության հոգևոր հովիվ Տեր Փառեն քահանա Պետրոսյանը, եկեղեցու մասին կցկտուր տեղեկություններ են պահպանված, բայց, ինչպես մյուս եկեղեցիները, այս մեկը ևս խորհրդային տարիներին ծառայել է որպես պահեստ: Այսօր եկեղեցին բաժանված է երկու մասի՝ մի մասն այդպես էլ ամայի կանգուն է մնում, իսկ եկեղեցական ծեսեր, պատարագներ ու ժամերգություններ կատարվում են մյուս հատվածում: Թեեւ եկեղեցին խիստ վթարային է՝ տանիքը փլվելուց պաշտպանում են հատուկ տեղադրված գերանները, սակայն գյուղաբնակները, ոչ այնքան հաճախ, բայց եկեղեցի հաճախում են: «Եկեղեցին վերանորոգելու ծրագիր վաղուց ունի համայնքը, բայց ամբողջական միջոցներ, ցավոք, չկան: Թեև պետք է ամբողջ գյուղը գա այն մտքին, որ կամաց-կամաց պետք է եկեղեցին վերանորոգվի, այլապես, միանգամից չի լինի: Հուսանք, որ կգա մի օր, որ եկեղեցին կվերականգնվի»,-նշեց Տեր Փառեն քահանը Պետրոսյանը:

Եկեղեցու վերանորոգման խնդրին անդրադարձավ նաև Միքայել սրբազանը՝ կոչ անելով երիտասարդներին միանալ և միասնական աղոթքով օգնել սեփական գյուղի եկեղեցին վերականգնելուն: «Եկեղեցին այս վիճակին հասել է մեր ձեռքով և մեր ձեռքով էլ պետք է վերականգնենք: Գյուղի երիտասարդներն անելիք ունեն: Եկեղեցու այսպիսի վիճակն անթույլատրելի է, սա ամոթ է բոլորիս համար: Եկեղեցու այս վիճակից տուժում է գյուղը. եթե մի պատահական մարդ անցնի գյուղով և տեսնի եկեղեցին, գյուղի մասին լավ կարծիք չի կազմի»,-նշեց սրբազանը՝ հույս հայտնելով, որ հաջորդ պատարագը կմատուցվի եթե ոչ ամբողջովին վերականգնված, գոնե որոշակիորեն վերոնորոգված եկեղեցում:

Արմենուհի Մխոյան