Սպանդարյանում համայնքապետի ընտրությունների արդյունքներով առաջինը Ավետիք Մխիթարյանն է

ԳՅՈՒՄՐԻ, 24 ՕԳՈՍՏՈՍԻ, ԱՐՄԵՆՊՐԵՍ : Շիրակի մարզի Սպանդարյան համայնքում օգոստոսի 24-ին անցկացվեց համայնքապետի արտահերթ ընտրություն` նախկին համայնքապետ Վաղինակ Բաղդասարյանի անժամանակ մահվան պատճառով: Համայնքի ղեկավարի թափուր տեղի համար առաջադրվել էին հինգ անկուսակցական թեկնածուներ: Մրցակցությունը ծավալվել էր համայնքապետարանի աշխատակազմի քարտուղար,, առաջադրված միակ կին թեկնածու՝ Գյուլվարդ Սահակյանի (ծնված 1967թ.), Ավետիք Մխիթարյանի (ծնված 1962թ., «Շին Կարկա» ՍՊԸ տնօրեն), Հարություն Հարությունյանի (ծնված 1972 թ.), Ալեքսան Խաչատրյանի (ծնված 1958թ.) և առաջադրված ամենաերիտասարդ թեկնածու Միքայել Բաղդասարյանի (ծնված 1985թ.) միջև: Ինչպես «Արմենպրես»-ին տեղեկացրեց Շիրակի մարզպետարանի աշխատակազմի ՏԻ և հանրապետական գործադիր մարմնի հարցերով վարչության տեղական ինքնակառավարման և համայնքնային ծառայության հարցերի բաժնի պետ Ռուբեն Հարությունյանը, ընտրություններն անցել են առանց լուրջ միջադեպերի, բողոքներ չեն գրանցվել:

Ըստ հիմնական ընտրացուցակների` ընտրողների թիվը կազմել է 1153 ընտրող: Ընտրության օրը ընտրողների ընդհանուր թիվը կազմել է 1167 քաղաքացի: Ի դեպ, քվեարկության օրն ընտրական տեղամասերում կազմված ընտրողների լրացուցիչ ցուցակների ընտրողների թիվը կազմել է 14: Անվավեր է ճանաչվել 19 քվեաթերթիկների: Համաձայն ընտրությունների նախնական արդյունքների առաջադրված թեկնածուները ստացել են հետևյալ կողմ ձայները` Բաղդասարյան Միքայել Վաղինակի – 121 կողմ, Խաչատրյան Ալեքսան Փայլակի – 179 կողմ, Հարությունյան Հարություն Անուշավանի – 80 կողմ, Մխիթարյան Ավետիք Գարուշի – 262 կողմ, Սահակյան Գյուլվարդ Արստակի – 95 կողմ:

Արմենուհի Մխոյան