1 րոպեի ընթերցում
ԵՐԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Թբիլիսիի Մետրոմշենի (Մետրոշին) հայաշատ ավանում կառուցվում է հայ-վրացական թիվ 103 դպրոցը, որը նախատեսված է հազար աշակերտի համար: Այդ մասին, ինչպես տեղեկացնում է «Արմենպրես»-ը, հաղորդել է Վրաստանի կրթության նախարարության մամուլի ծառայությունը:
«103-րդ հանրային դպրոցի կառուցումն ամենամասշտաբային նախագծերից մեկն է, ավելին, վերջին 20-30 տարում նման մեծության դպրոց չի կառուցվել»,- հայտարարել է Վրաստանի կրթության եւ գիտության նախարար Թամարա Սանիկիձեն, ով տեղում ծանոթացել է շինարարական աշխատանքների ընթացքին:
«Նախագիծը կարեւոր է, նկատի ունենալով այն, որ դա խառը դպրոց է, վրացական դպրոց, որտեղ կա բավականին մեծ հայկական հատված… Մենք առավելագույնս ջանում ենք օգնել էթնիկ փոքրամասնություններին, որպեսզի նրանք լիարժեք ու լավ ինտեգրվեն ուսումնական գործընթացին»,- նշել է Սանիկիձեն:
Նոր դպրոցը համապատասխանելու է ժամանակակից չափորոշիչներին: Նախագծի արժեքը շուրջ 5,5 մլն լարի է: Նոր դպրոցի կառուցման աշխատանքներն սկսվել են այս տարի եւ կավարտվեն եկող տարի: