Թուրքիան զինվորականներին հետ է կանչում արձակուրդներից
2 րոպեի ընթերցում
![Թուրքիան զինվորականներին հետ է կանչում արձակուրդներից](http://armenpress.am/resized/480/static/news/b/2015/07/813341.jpg)
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Թուրքիայի զինված ուժերի գլխավոր շտաբը Սիրիայի հետ սահմանում իրավիճակի սրման հետ կապված արձակուրդներից հետ է կանչել երկրի հարավարեւելքում տեղակայված դաշտային 2-րդ եւ 3-րդ բանակների հրամանատարական անձնակազմին:
Այս մասին, ինչպես հաղորդում է “Արմենպրես”-ը, հայտնում է թուրքական “Հուրիեթ” թերթը: Արձակուրդներից հետ կանչելու մասին հրամանը վերաբերում է նաեւ Թուրքիայի այլ շրջաններում ահաբեկչության դեմ պայքարում զբաղված ստորաբաժանումների անձնակազմերին:
Վերջին օրերին Թուրքիայում իրավիճակը սրվել է: Երեկ Սիրիայում գործող “Իսլամական պետություն” (ԻՊ) ահաբեկչական խմբավորման 5 մարտիկներ նռնականետերից եւ ավտոմատ զենքերից կրակ են բացել Թուրքիայի սահմանային Քիլիսի նահանգի սահմանապահ ուղեկալի վրա: Արդյունքում մեկ զինվոր զոհվել, երկուսը վիրավորվել են: Դիարբեքիրում ռազմական ավտոմեքենայի պայթեցման արդյունքում 2 զինվորներ զոհվել, 4 զինծառայողներ էլ վիրավորվել են: Միջադեպի հետ կապված թուրքական բանակը հատուկ գործողություններ է սկսել գործի դնելով ռազմաօդային ուժեր:
Անցալ շաբաթվա սկզբին Սիրիայի հետ սահմանային Ուրֆայի նահանգի Սուրուջ քաղաքում քրդական երիտասարդական կազմակերպության միջոցառման ժամանակ հզոր պայթյունի հետեւանքով 32 մարդ զոհվել, 100-ից ավելի մարդ էլ վիրավորվել էր: Թուրքիայի պաշտոնական շրջանակներն այդ պայթյունի պատասխանատվությունը դրել են ԻՊ-ի վրա: